Stander en Sauser kruip nader in Epic
2010-03-25 10:04
Eunice Visagie
Worcester - “Ons ry nou net elke dag asof daar geen volgende dag is nie.”
Só het Christoph Sauser (Switserland) gesê nadat hy en sy Suid-Afrikaanse spanmaat, Burry Stander (songo.info), Woensdag die vierde skof van die Absa Cape Epic gewen het.
Dit is hul tweede skofsege vanjaar in dié agtdaagse bergfietstoer nadat hulle Maandag ook baas was.
Hulle het die skof oor 90 km van Ceres tot hier in 3 uur 33 minute en 1 sekonde gewen.
Met dié vertoning is hulle nou derde algeheel nadat hulle in ’n stadium 20 minute agter die voorste jaers was. Hulle is nou 8 minute agter.
Stander het die eerste twee dae met ’n maagvirus gesukkel.
“Dit is nog steeds moeilik, want ek moet gereeld eet en drink.
“Dít beteken ek moet by elke waterpunt stop om te eet en te drink om my kragte op te bou,” het Stander gesê.
Die algehele voorlopers, Karl Platt en Stefan Sahm van Duitsland, was tweede.
Kevin Evans en Alban Lakata (MTN-Quebeka) was derde.
Trek-Brentjens se Bart Brentjens en Jelmer Pietersma het ’n slegte dag in die saal beleef.
Dié Nederlanders het van die tweede algehele plek tot vyfde uitgesak.
Evans van Suid-Afrika en Lakata (Oostenryk) is algeheel tweede en 6 minute agter.
- Sport24