Sportsterre met Nasionale Ordes vereer
2009-12-12 09:13
Erika Gibson
Khotso Mokoena moes sy lang, lenige lyf dubbel vou sodat pres. Jacob Zuma kon bykom om sy toekenning om sy nek te hang.
Natalie du Toit het weer ’n spesiale omhelsing van die president gekry.
En vir ’n verandering was Lewis Gordon Pugh in ’n pak klere eerder as in die ysige Arktiese seewater.
Saam was hulle onder die groepie Suid-Afrikaners wat gister met Nasionale Ordes as uitsonderlike landsburgers deur Zuma vereer is.
Du Toit en Pugh is met die Orde van Ikhamanga (goud) vereer vir hul prestasies as swemmers – Du Toit, weens die feit dat sy ten spyte van haar gestremdheid steeds onder die beste swemmers ter wêreld tel.
Pugh het reeds in elke oseaan geswem, maar hom onderskei deurdat hy as “menslike ysbeer” ook al in die Noordpool en in Antarktika gewys het waartoe die mens in staat is. Pugh is verder vereer vir sy bydrae om bewustheid oor aardverhitting te skep – veral waar ysberge besig is om te smelt, koraalriwwe doodgaan en laagliggende eilande onder die water verdwyn.
Mokoena, Suid-Afrika se voorste verspring-atleet, het die Orde van Ikhamanga (brons) ontvang vir sy atletiekprestasies.
“Mokoena het aan die jeug van Suid-Afrika bewys dat dit moontlik is om drome uit te leef,” lui sy sitaat. Hy kom uit ’n nederige werkersklasfamilie, maar het met deursettingsvermoë die boonste sport van atletiek bereik.
Volgens Zuma het dié sportmanne en -vrou, tesame met die ander ontvangers van die ordes die lewens van ander Suid-Afrikaners verryk sodat die land met reg homself as ’n nasie van helde, heldinne en presteerders kan noem.
“Voor 1994 het ons geen gemeenskaplike identiteit gehad nie. Ons was ’n veranderende nasie vol vrese en onsekerheid. Mense soos dié help ons om selfs met ons verskille steeds saam te staan,” het Zuma gesê.
Hy het ook aangekondig dat die ordes voortaan net een keer per jaar toegeken gaan word.
Dit sal op 27 April elke jaar gebeur om saam te val met Vryheidsdagvierings.
“Dít sal aan dié dag nuwe betekenis gee om ons nasionale helde en die stigtersvaders en -moeders van ons demokrasie te vereer.”
- Beeld