‘Spesiale sege’ vir Noorweër
2011-07-08 09:01
Pretoria – Edvald Boasson Hagen (Sky) het Donderdag se sesde en langste skof van die Tour de France gewen en daarmee sy ondersteuners reg bewys.
Fietsry-kenners voorspel die afgelope jaar al dat die 24-jarige Noorweër die talent het wat nodig is om belangrike renne te wen en hy het nie teleurgestel nie.
In die naelrit na die eindstreep het Hagen vir Matt Goss (HTC-Highroad) en Thor Hushovd (Garmin-Cervelo), algehele voorloper, weggejaag.
Dis die eerste keer dat Hagen ’n Tour-skof wen.
Hy het die 226 km (van Dinan na Lisieux) in 5 uur 13 minute en 37 sekondes afgelê.
Hagen het in ’n televisie-onderhoud gesê hy het nie woorde om te beskryf hoe dit voel om ’n skofwenner in die Tour te wees nie.
“Dit is ongelooflik. Ek dink ek sal eers later besef wat ek reggekry het. Wat my sege nog meer spesiaal maak, is dat my pa en ma hier was om dit te sien.”
Hagen was vol lof vir die wyse waarop sy spanmaat Geraint Thomas hom gehelp het.
“Geraint het te midde van al die chaos in die naelrit seker gemaak ek is oor die laaste 300 m in ’n gunstige posisie om op die regte oomblik te kan versnel.”
Hushovd het met sy kanniedood-benadering seker gemaak dat hy in vandag se sewende skof vir die vyfde agtereenvolgende dag die geeltrui sal dra.
Hy het steeds ’n voorsprong van ’n enkele sekonde oor Cadel Evans (BMC) en is 4 sekondes voor Frank Schleck (Leopard-Trek).
Manuele Mori (Lampre-ISD) was die dag se ander groot held.
Hy het basies vir die hele skof in die koue en nat toestande voor in wegbreek-pogings gejaag en het enduit geweier om bes te gee.
Hy is eers 3 km van die einde ingehaal.
Dinge wil maar steeds nie vir Alberto Contador (Saxo Bank), ’n driemalige wenner, reg verloop nie.
Gister het hy weer ’n klein krisis beleef en moes inderhaas van fietse verwissel.
Gelukkig was sy spanmaat Jesus Hernandez byderhand toe dit saak gemaak het.
Levi Leipheimer (Radio Schack), een van die Tour-gunstelinge, was die groot verloorder.
Sowat 6 km van die einde het sy fiets se een wiel op die teerpad se sopnat wit lyn onder hom uitgegly.
Jaer en fiets het vir meters oor die teerpad geskuur. Die valslag het Leipheimer gekos.
Hy kon nie weer die voorlopers inhaal nie en het eers 1 minuut en 5 sekondes ná al die ander gunstelinge oor die eindstreep gejaag.
Dit beteken dat hy van die 14de tot die 31ste plek teruggesak het.
Hy is nou 1:31 agter Hushovd.
Vrydag se skof (Le Mans na Chateauroux – 218 km) is plat en vinnig.
Vir die jongste sportnuus volg Nuus24Sport op Twitter.
– Sport24