Spele-plek vir Schoeman
2010-04-16 08:33
Marizanne Kok
Durban-Riaan Schoeman was Donderdagaand hier die groot uitblinker op die vierde aand van die nasionale swembyeenkoms in ’n sessie wat talle blink vertonings opgelewer het.
Schoeman het sy naam gevoeg by die lys swemmers wat reeds vir die Statebondspele in Oktober in Indië gekwalifiseer het toe hy die kwalifiserende tyd in die eindronde van die 400- individuele wisselslag met 4 sekondes oortref het.
Sy tyd van 4 minute 14.80 sekondes is op een na die vinnigste tot dusver vanjaar.
Dit het aan hom sy eerste goue medalje van die byeenkoms besorg en hom byna 5 sekondes voor Chad le Clos (tweede) laat eindig.
“My enigste doelwit hier was om te kwalifiseer vir die Statebondspele, maar met die kriteria vanjaar so taai het ek geweet dit sou ’n groot poging verg.
Ek is tevrede – dié tyd behoort my veilig tussen die top-4 in die Statebond te plaas,” het Schoeman gesê.
Die Pretorianer Chanelle van Wyk het ook haar kaartjie na Indië bespreek toe sy die Statebond-vereiste in die halfeindronde van die 50-rugslag met twee honderdstes van ’n sekonde oortref het.
“Ek het dit rustig gevat (in Donderdagoggend se uitdunne) sodat ek varser in die halfeindronde kon wees.
Die druk is nou af in die eindronde en nou kan ek eindelik al my aandag op die Statebondspele begin fokus,” het sy gesê.
)Die 100-vryslag vir mans het ’n opwindende stryd tussen vier van die vinnigste mans in die land opgelewer.
Roland Schoeman het die Florida-student Gideon Louw met ’n haarbreedte om die goue medalje geklop nadat die jonger man ’n vasberade aanslag geloods het.
Louw het gegly op die wegspringblok en was sowat 2 meter agter Schoeman teen die tyd dat hy die water getref het.
Hy het goed teruggeveg en in 49.62 s tweede ná Schoeman (49.51) geëindig.
Die 20-jarige Graeme Moore was derde in 49.99 en Darian Townsend vierde in 50.09.
Nie een van dié vertonings was goed genoeg vir kwalifisering nie, met die vereiste 49.23.
n Taai stryd wag vanaand in die eindronde van die 100-rugslag tussen Charl van Zyl, Darren Murray en Gerhard Zandberg.
Die kwalifiseringstyd is 55.14 s.
Natalie du Toit het nog ’n kwalifiseringstyd geswem – in die 100-vlinderslag vir S9-swemmers.
Sy het haar sesde goue medalje hier gewen.
Mandy Loots (100-vlinderslag), Wendy Trott (800-vryslag) en Pal Joensen van die Faroër-eilande (800-vryslag vir mans) het ook goud gewen.
-Sport24