Spandokter weet van Semenya-toetse
2009-09-18 07:21
Wilhelm de Swardt
Johannesburg - Dr. Harold Adams, spandokter van Atletiek Suid-Afrika (ASA), het geweet van die geslagstoets wat in Pretoria op Caster Semenya gedoen is.
Beeld het gister afskrifte van e-posse tussen Adams en die Internasionale Vereniging van Atletiekfederasies (IAAF) van ’n betroubare bron ontvang.
Die IAAF het Adams op 3 Augustus per e-pos versoek om die uitslae van die toetse wat op Semenya gedoen moes word aan te stuur. Adams het die IAAF die volgende dag per e-pos geantwoord en gesê hy is besig om te reël dat Semenya getoets word.
Hy het onderneem om die volledige uitslae saam Berlyn toe te neem sodat ASA en die IAAF dit kan bespreek. Dit blyk uit die e-posse daar is gehoop dat op ’n kalm wyse oor Semenya se toekoms besluit kon word.
Volgens Beeld se bron was dit vir die IAAF belangrik dat Semenya se menseregte en waardigheid nie deur die toetse benadeel word nie.
Adams het glo op 15 Augustus in ’n mondelinge gesprek aan die IAAF erken daar is sekere onsekerhede oor Semenya se geslag.
Hy het nie die redes vir sy bedenkinge op skrif gestel nie.
Adams was glo in die buiteland toe toetse in ’n Pretoriase hospitaal op Semenya gedoen is.
Ondanks herhaaldelike versoeke aan Adams om die volledige uitslae van die toetse aan die IAAF beskikbaar te stel, het hy dit glo nooit gedoen nie.
Dit is waarom die IAAF inderhaas in Berlyn reëlings moes tref om Semenya te toets.
- Beeld