Sonny Bill wen swaargewig-titel
2012-02-08 13:12
Hamilton – Sonny Bill Williams se jaar het op 'n hoogtepunt in die bokskryt afgeskop toe hy sy Amerikaanse teenstander, Clarence Tillman, Woensdagaand in Hamilton met 'n uitklophou in die eerste ronde verslaan het.
Volgens die stuff.co.nz-webtuiste spog Williams nou met 'n onoorwonne rekord van vyf gevegte.
Die All Black-senter het Tillman met 'n linker-haakhou getref, voordat hy hom met houe gepeper het wat sy opponent kop onderstebo aan die toue laat hang het.
Die skeidsregter Lance Revill het die geveg een sekonde voor die einde van die eerste ronde gestaak.
Die vuiste het reeds by Dinsdag se inweegsessie geklap toe Tillman sy humeur verloor en Williams op die ken geslaan het.
Laasgenoemde het met ’n regter-haakhou in Tillman se gesig gereageer.
Anthony Mundine, ’n Australiese beroepsbokser asook ’n voormalige rugbyliga-speler wat met Williams bevriend is, het Tillman toe na die vloer getrek en hom van Williams af weggedruk.
Williams sal Maandag weer terug wees op die rugbyveld wanneer hy saam met sy Chiefs-spanmaats vir die komende Super-rugbyseisoen voorberei.
Vir die jongste sportnuus volg Nuus24Sport op Twitter.
– Sport24