'Sonny Bill moet eerder teen my seun boks'
2013-02-05 13:18
Johannesburg – Suid-Afrika se bokskampioen Francois Botha het op die vooraand van sy geveg teen Sonny Bill Williams in Brisbane, gesê die rugbyster moes eerder teen sy seun geboks het.
"Ek gaan hom na die diep kant toe trek en hom daar laat verdrink. Hy het nog nooit teen 'n ou soos ek geboks nie. Sonny moes eerder teen my seun geboks het, my seun sou sy agterent geskop het en hy is nie eers 'n professionele bokser nie," het Botha gesê.
Quade Cooper, die stoutseun van Australiese rugby, maak ook Vrydagaand sy boksdebuut in Brisbane.
Die 44-jarige Botha het al 60 keer deur die toue geklim en teen legendes soos Mike Tyson en Lenox Lewis geboks.
Daarteenoor het Williams slegs vyf gevegte op sy kerfstok, maar die Nieu-Seelander is jonger, fikser én sterker.
Williams het beloof dat hy sy bokshandskoene sal ophang indien Botha hom klop.
Die sleutel vir Williams sal wees om van agter sy steekhoue te boks en hy moet sy spoed en beweging gebruik om Botha op 'n afstand te hou.
Botha sal Williams naby hom wil hou en onkant probeer betrap.
"Sonny Bill lyk soos 'n Hollywood-ster. Die probleem is hy boks ook soos een," het Colin Nathan, 'n plaaslike afrigter, wat voorheen met die White Buffalo gewerk het, gesê.
Die geveg word Vrydag vanaf 10:00 regstreeks op Supersport 5 uitgesaai.
Vir die jongste sportnuus volg Nuus24Sport op Twitter.
- SAPA
