Sonny Bill klop Botha in omstrede stryd

2013-02-08 14:37

Brisbane – Die Nieu-Seelandse rugbyster Sonny Bill Williams het die Suid-Afrikaanse swaargewig-kampioen Francois Botha in Brisbane met punte geklop nadat die geveg op omstrede wyse vanaf 12 tot 10 rondes verkort is.

Die beoordelaars het die oorwinning met 97-91, 98-94 and 97-91 aan Williams toegeken.

Botha het 'n punt verloor omdat hy 'n hou gegooi het na die klok gelui het, maar Williams is ook met 'n punt gestraf vir negatiewe boks toe die Suid-Afrikaner hom in die negende ronde begin seermaak het.

"Ek is mal oor Sonny Bill, maar hierdie is bullsh*t," het Botha na afloop van die boksgeveg gesê.

Botha se afrigter het ook kapsie gemaak oor die omstrede beslissing deur die skeidsregter om die geveg tot 10 rondes te verkort.

Vroeër het die Wallaby-losskakel Quade Cooper sy eerste professionele boksgeveg gewen toe hy sy landgenoot Barry Dunnett in die eerste ronde planke toe gestuur het.

Vir die jongste sportnuus volg Nuus24Sport op Twitter.

– Sport24

- Sapa - AP