Sokkerspeler met klip gegooi, breek kakebeen
2012-12-11 13:11
Nieu-Delhi – Die Indiese sokkerspeler Syed Rahim Nabi sal minstens ses weke op die kantlyn wees met 'n gebreekte kakebeen nadat hy tydens 'n wedstryd met 'n klip gegooi is.
Nabi (26) moes 'n operasie ondergaan vir die besering wat hy tydens Sondag se wedstryd tussen sy klub, Mohun Bagan, en East Bengal voor 85 000 mense by die Salt Lake-stadion in Kolkatta opgedoen het.
Mohun Bagan was met 0-1 agter toe 'n klip, wat blykbaar na die skeidsregter gemik is, uit die pawiljoen gegooi is en Nabi getref het.
Dié voorval volg nadat Manchester United se Rio Ferdinand met 'n muntstuk, wat sy oogbank oopgekloof het, gegooi is tydens Sondag se kragmeting met Manchester City.
Volg Nuus24Sport op Twitter.
- Sapa - AFP
