Skokonthulling: Opkikkers algemeen in Australiese sport

2013-02-07 08:31

Canberra – 'n Ondersoek deur die regering het grootskaalse opkikkergebruik en bande met georganiseerde misdaad in Australiese sport oopgevlek.

Die Australiese misdaadkommissie (ACC) het die bevindings van die jaar lange ondersoek genaamd "Projek Aperio" Donderdag vrygestel, met bewyse van wedstrydknoeiery, die grootskaalse gebruik van verbode middels en die infiltrasie van misdaadgroepe in die verspreiding van opkikkers.

Die land se minister van justisie, Jason Clare, het gesê "die bevindings is skokkend en sal Australiese sportondersteuners walg."

Die ACC het gesê hy kan nie inligting van individuele of betrokke sportsoorte openbaar maak nie, maar dat hy geklassifiseerde gesprekke met administrateurs en sommige sportkodes en klubs gevoer het.

Die Australiese sokkerliga-klub Essendon het vroeër die week owerhede gevra om sekere middels te ondersoek wat dié klub in hul 2012-fiksheidsprogram gebruik het.

Vir die jongste sportnuus volg Nuus24Sport op Twitter.