Sjuut vir Tiger Woods
2009-11-09 12:09
Melbourne - Organiseerders van die Australiese Meesterstoernooi gaan toeskouers verbied om kameras en selfone saam met hulle te dra om sodoende ‘n herhaling van verlede week se voorval gedurende die Shangai toernooi, te vermy.
Tiger Woods het glo woedend geraak nadat hy herhaaldelik versteur is.
Dit is Woods se eerste verskyning in elf jaar by dié toernooi en die organiseerders wil geen kanse met entoesiastiese aanhangers waag nie.
Al 25 000 kaartjies vir elk van die vier dae van die toernooi is reeds vroeër die maand uitverkoop, en groot skares blyk ‘n logistieke nagmerrie vir organiseerders te wees wat ook sekuriteit vir Woods verskerp het.
Woods het verlede week tydens die HSBC kampioenetrofee in Shanghai sy humeur verloor toe ‘n kamera geflits het terwyl hy van die sewende putjie afgeslaan en sy bal in ‘n sandbank beland het.
Woods het geskreeu, “ek kan net nie ‘n hou in kry nie” en onderlangs gevloek.
Daarna het niks vir die Amerikaner reg verloop nie.
Hy het vyf houe agter die uiteindelike wenner, Phil Mickelson geeïndig.
Die gedagte aan groot skares het organiseerders senuweeagtig gemaak en hulle het mense op dié toernooi se webtuiste gewaarsku dat geen selfone of kameras op die golfbaan tydens die toernooi toegelaat sal word nie.
- Sapa