Sharapova se opmars kan vrugte afwerp
2011-07-02 08:15
Londen – Die lang pad uit die tenniswildernis kan Saterdag hier in die Wimbledon-toernooi vir Maria Sharapova eindig wanneer sy in die eindstryd teen die Tsjeg Petra Kvitova te staan kom.
Die 24-jarige vyfde gekeurde Rus is die oorweldigende gunsteling om die titel te herower wat sy die eerste keer in 2004 gewen het.
Sy het die tennistoneel toe behoorlik stormgeloop en voor sy 21 was ook die Australiese en Amerikaanse Ope gewen.
Haar opmars na die bopunt van vroue-tennis is egter deur ’n skouerbesering van koers gewaai en daar is gewonder of sy ooit bo sou uitkom.
Sy het vanjaar die antwoord gegee deur eers die halfeindronde van die Franse Ope te haal en nou die eindstryd hier.
Met Serena en Venus Williams van Amerika se loopbane wat in die verkeerde rigting neig en Kim Clijsters beseer, is daar ’n vakature aan die bopunt van vroue-tennis wat Sharapova lyk of sy kan vul.
Sy erken dit was donker dae in 2008 en 2009 toe sy tot buite die voorste 100 op die wêreldranglys geval het.
“Daar was baie twyfel en ek het hoë verwagtinge gestel waaraan ek nie kon voldoen nie. Dit was baie frustrerend.
“Ek het egter nooit daaraan gedink om handdoek in te gooi nie. Wat my laat aanhou het, was die herinneringe van die goeie dae aan die begin van my loopbaan.
“Ek is nie iemand wat sommer boedel oorgee nie. Al was dit moeilik, het ek bly glo in myself. Baie krediet moet gaan aan die mense rondom my.
“Ek het ook geweet hoe goed dit voel om die groot trofeë te wen en ek wou meer hê. Ek het hier diep binne my ook gevoel daar is nog baie goeie dinge wat wag.”
Sy staal haar vir ’n kwaai aanslag van die 21-jarige Kvitova, agtste gekeurde, in die eindstryd.
In hul enigste vorige ontmoeting het Sharapova verlede jaar in Memphis op ’n hardebaan-oppervlak gewen.
“Sy is links en dit is moeilik om op gras teen die hotkloue te speel,” het Sharapova erken.
Kvitova is die eerste linksspeler sedert Martina Navratilova in 1994 wat die eindstryd haal.
Sy het Navratilova, wat haar inspirasie was toe sy klein was, in die kleedkamer gesien en is deur haar sterkte toegewens.
“Ek sukkel nog om te glo ek is in die eindstryd,” het Kvitova gesê.
– Sapa-AP
– Bly op hoogte van al die jongste sportnuus deir Nuus24Sport op Twitter te volg
- Die Burger