Sharapova gereed vir Lisicki-bomme
2011-06-30 08:44
Londen. – Maria Sharapova is slaggereed om vuur met vuur in haar Wimbledon-halfeindstryd teen Sabine Lisicki te beveg.
Sharapova, 2004 se kampioen, is die gunsteling om met dié tennistitel weg te stap.
Dié Rus kom teen ’n speler te staan wat waarskynlik die gevaarlikste afslaan in vroue-tennis het. Die Duitser slaan gereeld teen ’n spoed van meer as 190 km/h af.
“’n Speler wat met soveel selfvertroue op gras speel, is gevaarlik,” sê die vyfde gekeurde, Sharapova.
Sy glo ook dat brute krag, eerder as finesse, die wenner van dié stryd sal bepaal. Lisicki se kragspel was reeds vir die ondergang van die derde gekeurde en Franse Ope kampioen, Na Li van China, verantwoordelik.
Li het Lisicki se afslane as onspeelbaar bestempel. Lisicki is slegs die tweede promotorskeuse in die geskiedenis van Wimbledon wat die halfeindronde kon haal.
Sy is egter nie gespanne oor die vooruitsig om teen Sharapova te speel nie. “Maria het al Grand Slam-titels verower en is gewoond daaraan om in die halfeindronde van sulke toernooie te wees. Ek het niks om te verloor nie. Ek gaan net speel en dit geniet.”
Lisicki se loopbaan is deur ’n ernstige enkelbesering bedreig, wat sy verlede jaar in Miami opgedoen het. Sy was vyf maande lank buite aksie en kon ’n tyd lank nie loop nie.
Die ander halfeindstryd is tussen die agtste gekeurde, Petra Kvitova van die Tsjeggiese Republiek, en Victoria Azarenka van Belarus, wat vierde gekeur is.
Dit is die eerste keer dat Azarenka in die halfeindronde van ’n Grand Slam-toernooi speel. Kvitova het haar verlede maand in Madrid in die eindstryd van ’n toernooi geklop.
“Die halfeindstryd hier sal ’n ander storie wees.
“Dis glad nie dieselfde nie. Die verlede beteken niks,” sê Azarenka.
Kvitova kan die eerste linkerhandse speler word wat die Wimbledonse vroue-enkelspeltitel verower sedert Martina Navratilova dit in 1990 reggekry het. Die laaste Tsjeg wat die Venus Rosewater-trofee omhoog kon hou, is Jana Novotna in 1998.
Vir die jongste sportnuus volg Nuus24Sport op Twitter.
– Sport24
- Sapa - AFP