Serena Williams onttrek uit nog 'n toernooi
2010-09-23 11:42
Tokio – Die eerste gekeurde vroue-tennisspeler, Serena Williams, moes weens haar voetbesering aan die Pan Pacific-toernooi in Japan onttrek, het organiseerders Donderdag gesê.
Williams het kort nadat sy haar vierde Wimbledon-titel in Julie vanjaar gewen het, haar regtervoet beseer toe sy op gebreekte glas getrap het.
Organiseerders van die Pan Pacific-toernooi het gesê die wenner van 13 Grand Slams het nog nie voldoende herstel van die operasie wat sy moes ondergaan en wat haar ook uit die Amerikaanse Ope gehou het nie.
Die meeste van die 30 top-tennisspelers sal deelneem aan die $2 miljoen (sowat R14 miljoen) hardebaan-toernooi wat vanaf 26 September tot 2 Oktober in Tokio plaasvind.
Bly op hoogte van al die jongste sportnuus deur Nuus24Sport op Twitter te volg.
- Sport24