Semenya verras by Tuks
2011-01-31 13:29
Pretoria - Caster Semenya, Suid-Afrika se vroue-wêreldkampioen in die 800 m, het Saterdagmiddag verras deur aan ’n 800-wedloop op ’n ligabyeenkoms van die Tukkies deel te neem, berig Sport24.
Dit was die eerste keer dat Semenya in aksie was nadat sy haar verlede jaar weens ’n rugbesering aan die Suid-Afrikaanse Statebondspele-atletiekspan onttrek het.
Hoewel haar wentyd van 2 minute 9.60 sekondes niks is om oor opgewonde te raak nie, is Michael Seme, haar afrigter, tevrede. “Die plan was nie dat Caster ’n vinnige tyd moes hardloop nie. Dit was eintlik niks anders as ’n harde oefensessie nie. Ons wou vasstel hoe haar rug sal reageer wanneer sy aan ’n wedloop deelneem.
“Dit het heel goed gegaan. Caster het gesê haar rug pla nog effens, maar dis niks ernstigs nie.”
Volgens Seme is die kans goed dat sy dalk nou vroeër aan die Geelbladsye-reeks sal deelneem.
- Simoné du Toit het Saterdag op ’n binnenshuise byeenkoms in Houston die tweede keer in twee weke haar beste afstand in die gewigstoot verbeter toe sy 17.49 m gestoot het.
Sy het twee weke gelede op ’n binnenshuise byeenkoms in Dallas ’n afstand van 17.45 m behaal.
Haar pa, Boesman, sê sy was erg gefrustreerd omdat soveel dinge vooraf verkeerd geloop het.
Sy het haar nek in die bus verlê en die busbestuurder het boonop verdwaal. Dit het daartoe gelei dat die atlete laat by die byeenkoms opgedaag het en daar geen tyd vir Du Toit was om vooraf op te warm nie.
“Simoné het basies net by die stadion opgedaag, toe moes sy begin deelneem. Sy glo dat as dinge anders uitgedraai het, sou sy dalk 18 m kon stoot.”
- Anika Smit, Statebondspele-kampioen in 2006, het op die ligabyeenkoms by die Universiteit van Pretoria die hoogspring met ’n hoogte van 1.83 m gewen.
Haar wenhoogte is beter as die hoogte waarmee die goue medalje op verlede jaar se Suid-Afrikaanse senior byeenkoms gewen is.
Smit was baie opgewonde oor haar vertoning. “Ek weet ek is tot ’n beter hoogte in staat. Hoewel ek nog simpel foute begaan, dink ek ek kan nou al 1.86 of 1.88 m spring.”
- Tlou Seloba van die Benoni High School het Saterdag op ’n ligabyeenkoms in Germiston vir verskeie internasionale atlete weggehardloop om die 800 m in 1:48.20 te wen. Kristof van Malen van België was tweede in 1:49.20.
Vir die jongste sportnuus volg Nuus24Sport op Twitter.
- Sport24