Semenya sleep koerant dalk hof toe
2009-11-15 15:19
Pieter Malan en Marthinus van Vuuren
Die beleërde 800m-atleet Caster Semenya se regsverteenwoordigers oorweeg regstappe teen die Britse dagblad The Guardian nadat ’n verslaggewer van die koerant glo “onder valse voorwendsels” ’n breedvoerige onderhoud met haar gevoer het.
In die artikel, wat drie blaaie van die koerant se sportseksie beslaan, sê sy sy is steeds vol hoop dat die Internasionale Vereniging van Atletiekfederasies (IAAF) die komende week in haar guns sal beslis en dat sy haar atletiekloopbaan volgende jaar sal kan voortsit.
Die IAAF sal na verwagting Vrydag die uitslae van Semenya se geslagstoetse aan die relevante partye bekend maak en beslis of sy steeds as ’n vrou mag deelneem. Dié liggaam het egter vroeër gesê die uitslag is privaat en sal nie aan die groot klok gehang word nie.
Dit blyk dat joernalis van The Guardian Donald McRae by Semenya se eerste oefensessies was nadat die storm om haar kop losgebars het.
Greg Nott, Semenya se prokureur, kon nie teen druktyd aan Rapport sê wat die “valse voorwendsels” van die onderhoud behels nie.
Hy het wel in ’n verklaring gesê Semenya “weier steeds om enige onderhoud aan enigeen toe te staan”.
“Die redes vir ons kliënt se posisie is voor die hand liggend.”
Die aanhalings en verwysings na Semenya in die artikel is glo “onder valse voorwendsels en op ’n verkeerde en onwettige manier by haar bekom”.
Semenya sê ook in die artikel sy voel tuis tussen haar mede-atlete aan die Universiteit van Pretoria.
“Hulle weet wie ek is. Ek is net Caster vir hulle. Ek voel goed saam met hulle.”
Sy sê buiten die atletiekbaan en universiteit is daar nie meer “veel plekke” waar sy op haar gemak voel nie. “Mense wil na my staar. Hulle wil aan my vat. Ek is veronderstel om beroemd te wees, maar ek dink nie ek hou baie daarvan nie.”
Het die gebeure haar verander?
“Wat is die punt daarvan om te verander? As ek iemand anders word, sal dit sleg wees. As ek anders optree teenoor my vriende sal hulle nie gelukkig wees nie. Dit is belangrik vir my om dieselfde te bly. Ek kan steeds saam met my vriende lag.”
Sy het luidens die artikel geweier om vrae oor haar geslag of die IAAF-toetse te beantwoord.
- Rapport