Semenya sal gou weet of sy kan hardloop
2010-03-29 10:39
Pretoria. – Daar behoort teen Maandagmiddag uitsluitsel te wees oor Caster Semenya, die vroue-wêreldkampioen in die 800 m, se beplande deelname aan Dinsdag se Geelbladsye-byeenkoms in Stellenbosch.
Ray Mali, waarnemende voorsitter van Atletiek Suid-Afrika (ASA), gaan tydens ’n telefoniese konferensie by die besluitnemers van die internasionale vereniging van atletiekfederasies (IAAF) hoor wat hom te doen staan as Semenya in Stellenbosch opdaag en daarop aandring om deel te neem.
Dit is onduidelik waar die gerugte oor Semenya se deelname ontstaan het.
Michael Seme, haar afrigter, het Sondag ontken dat hy enigiets daarvan weet. Sy enigste antwoord toe hy daarna gevra is, was dat dit nuus vir hom is.
Paul Martin, woordvoerder van Geelbladsye, sê daar is nie ’n 800 m-wedloop vir vroue op die byeenkoms in Stellenbosch nie en Semenya se naam verskyn nie op die lys van deelnemers nie.
Volgens hom dra hy ook geen kennis van die vliegtuigkaartjie wat glo reeds vir Semenya gekoop is nie.
Hy het dit duidelik gestel dat die borge nie vir Semenya se kaartjie sou betaal het nie.
Semenya is wel hard aan die oefen. Die atlete wat haar reeds in aksie gesien het, sê sy is heelwat skraler as verlede jaar.
Beeld het betroubaar verneem dat die nuutste gerugte oor Semenya ’n manier kan wees om die IAAF te dwing om op te hou sloer en sy besluit oor haar toekoms bekend te maak.
Daar is weer daarop gewys dat Semenya nooit amptelik deur die IAAF geskors is nie en dat sy kan deelneem waar en wanneer sy wil, ondanks ’n onderlinge ooreenkoms dat sy sal wag totdat die ondersoek na haar geslag afgehandel is.