Semenya-resultate steeds nie bekend
2009-11-19 05:05
Parys – Caster Semenya staar nog ‘n vertraging in haar toetsresultate in die gesig nadat dit Woensdag bekendgemaak is dat mediese toetse steeds nie voltooi is nie.
Semenya, wat die 800m wêreldkampioen-titel in Berlyn verower het, sou Vrydag die uitslag van die toetse by ‘n hoë-vlak IAAF vergadering in Monaco gehoor het.
Maar die IAAF het gesê dat gesprekke nog onderweg was.
“Die IAAF, die Suid-Afrikaanse ministerie van sport en rekreasie en Caster Semenya se verteenwoordigers was, en is steeds, in gesprekke met die doel om die kwessies rondom Caster se deelname in atletiek op te los,” het ‘n verklaring van die IAAF gesê.
“Die IAAF sal nie kommentaar lewer oor die mediese aspekte van Caster Semenya se saak nie. Die mediese toetse van die atleet word nog voltooi.”
“Caster Semenya se saak sal nie by die opkomende IAAF raadsvergadering op 20 en 21 November in Monaco bespreek word nie.”
Die IAAF het verskeie opsies – hulle kan haar verban om weer deel te neem, vereis dat sy ‘n operasie ondergaan of geen aksie neem nie.
Toetsresultate wat uitgelek het, het daarop gedui dat Semenya ‘n hermafrodiet is en het groot woede by die Suid-Afrikaanse publiek en regering laat opvlam.
- AFP