Semenya-resultate regtig geheim?
2009-11-19 20:25
Johannesburg – Daar is geen waarborg dat die uitslae van ‘n geslagstoets wat op die atleet Caster Semenya gedoen is konfidensieel gehou sal word nie, het die minister van sport en rekreasie, Makhenkesi Stofile, Donderdag gesê.
“Ons kan dit nooit verseker nie,” het Stofile gesê en bygesê dat die oorsprong van die geslagstoetse wat uitgelek het nie opgevolg is nie.
Stofile se opmerkings volg op vrae van die media oor die aankondiging van ‘n ooreenkoms tussen die regering, Semenya se prokureurs en die Internasionale Vereniging van Atletiekfederasies (IAAF).
As deel van die ooreenkoms sal Semenya die goue medalje wat sy by die wêreld-kampioenskappe vroeër die jaar gewen het kan hou, sowel as die titel van 800m kampioen en haar prysgeld.
Stofile het gesê dat die IAAF Vrydag sal vergader wanneer die saak geformaliseer sal word.
Dit sal ‘n “breek van vertroue” wees as die IAAF nie saamstem met die ooreenkoms nie.
In ‘n vroeëre verklaring het die departement gesê dat die IAAF ooreengekom het dat die toetse wat op Semenya gedoen is as konfidensieel tussen pasiënt en dokter hanteer sal word.
“Daar sal geen publieke aankondiging wees oor wat die paneel van wetenskaplikes gevind het nie,” het die verklaring gesê.
Volgens Stofile kan die resultate so vroeg as die naweek aan Semenya gegee kan word.
“Ons vra alle Suid-Afrikaners en ander mense om hierdie professionele, etiese en morele manier van dinge doen te respekteer.”
- Sapa