Semenya reg vir 2010
2010-01-13 21:43
Johannesburg – Die wêreld 800m-kampioen Caster Semenya gaan deelneem aan Suid-Afrika se plaaslike atletiek-seisoen terwyl sy wag om haar lot van die Internasionale Vereniging van Atletiekfederasies (IAAF) te hoor.
Atletiek Suid-Afrika (ASA) het Woensdag gesê dat Yellow Pages weer as borg gaan optree en dat Semenya se afrigter, Michael Seme, bevestig het dat sy aan die einde van die maand met haar 2010-seisoen gaan wegspring.
ASA sal nog die skedule van die Yellow Pages-reeks bekendmaak, maar Seme het gesê dat Semenya aan die eerste geleentheid van die reeks sal deelneem.
“Sy sal in ten minste drie Yellow Pages wedlope deelneem hierdie jaar,” het Seme Woensdag gesê.
Sy sal wel nie in meer as een 800m wedloop deelneem voor die nasionale kampioenskappe nie, het Seme bygevoeg.
Die 19-jarige fokus tans op spoedwerk voordat die besige seisoen gaan afskop.
- Sapa