Semenya kook sommer vroeg
2011-02-20 13:44
Johannesburg - Koes, wêreld, Caster Semenya is kláár aan die kook – en sy gaan oor ses maande in Suid-Korea haar wêreldtitel in die 800 met ’n hengse baklei verdedig.
En die spiesgooier Robert Oosthuizen het sommer met die intrapslag die kwalifiserende vereiste vir die wêreldkampioenskappe (82.00) lag-lag met ’n yslike gooi van 83.82 oortref.
En Justine Robbeson het in die vroue-spiesgooi met ’n 60.93 ’n skrale 7 cm duskant die vereiste vir Suid-Korea gedraai.
Dít was die heel belowende boodskap van vanjaar se eerste Geelbladsye-atletiekbyeenkoms Saterdagmiddag in Potchefstroom.
Semenya het duidelik ’n grappie gemaak toe sy vroeër die afgelope week geskimp het dat ’n Potch-wentyd van “2:10” haar heel tevrede sou laat voel. Sy het Saterdag in 2:04.13 gewen – en in die proses sommer ook hakskene gewys vir die huidige SA kampioen, Mapaseka Makhanya.
Makhanya was tweede in sélf ’n goeie 2:04.99.
Dié was maar Semenya se tweede wedloop vanjaar nadat sy nou anderdag op ’n laeprofiel-byeenkoms in Pretoria afgeskop het.
Semenya kwalifiseer outomaties vir die wêreldkampioenskappe in Daegu vanweë haar nou-beroemde (of is dit berugte?) weghol-sege by die vorige wêreldkampioenskappe in 2009 in Berlyn.
Oosthuizen se puik afstand met sy derde gooi sal vir hom soos ’n soete melodie klink nadat hy homself amper ’n jaar gelede in Durban by die SA kampioenskappe ernstig beseer het. Hy het daarna feitlik heel seisoen op die kantlyn gesit en hande klap vir die man wat hom in Durban geklop het – Hardus Pienaar.
Pienaar was tweede met ’n – vir hom beskeie – 74.53. Wanneer hy die dag óók weer kook, kan hy en Oosthuizen vir rillers sorg – en albei kan in Suid-Korea hul buitelandse broers ’n bloedneus of twee gee.
Robbeson het sélf verlede jaar rustig gevat – en toegesien hoe haar NWU-Puk-spanmaat Sunette Viljoen die SA rekord verby 66 m skuif én die Statebondstitel wen.
Saterdag het Justine met ’n 60.93 gewen en Sunette was tweede met ’n rustige 55.85. Ook dié twee wêreldklas-spiesgooiers is medalje-materiaal in Daegu.
Met LJ van Zyl nog nie aan’t hardloop nie, het die jonge Matie Cornél Fredericks gister die eerste SA man vanjaar onder 50 sekondes in die 400-hekkies geword.
Cornél het in ’n heel belowende 49.60 gewen.
- Rapport