'Semenya het mediese behandeling gehad'
2010-07-08 08:33
Pretoria. - Caster Semenya het die afgelope paar maande mediese behandeling gekry – dit is die rede waarom sy nou toegelaat word om as vroue-atleet mee te ding.
Marius van der Watt, ’n Suid-Afrikaanse afrigter, het Woensdag gesê ’n hoë amptenaar van Atletiek Suid-Afrika (ASA) het dit aan hom gesê.
Richard Stander, administratiewe hoof van ASA, wou nie gisteraand erken of ontken dat Semenya behandeling gekry het nie.
Plaaslike atletiekafrigters het gister gesê die Internasionale Vereniging van Atletiekfederasies (IAAF) het gefouteer om dié behandeling nie bekend te maak nie. Hulle het gesê hulle hoor net skielik Caster mag weer deelneem, maar daar word geen verduideliking verstrek oor wat nou eintlik in die afgelope 11 maande verander het om die IAAF tot ander insigte te bring nie.
Atlete het gister gesê hulle is nuuskierig oor wat Semenya se tye nou gaan wees ná die hormoonbehandeling.
Jean Verster, ’n afrigter, het gesê hy aanvaar dat atlete verlig is om te weet wat met Semenya aangaan. “My enigste vraag is waarom het Caster nie die behandeling voor die wêreldbyeenkoms in Berlyn gekry nie? Dit sou beslis vir haar en die hele Suid-Afrika ’n groot verleentheid gespaar het.”
Jenny Meadows, die Britse bronsmedaljewenner in die 800 m by die Wêreldbyeenkoms in Berlyn waar Semenya gewen het, het aan die Daily Telegraph gesê die IAAF se besluit verbaas haar nie.
“Ek het altyd geweet Caster gaan weer deelneem.
“Ek is net soos almal nuuskierig om te sien wat gaan gebeur wanneer Caster die eerste keer deelneem.”
Bly op hoogte van al die jongste sportnuus deur Nuus24Sport op Twitter te volg.
- Sport24