Semenya gaan heldeontvangs kry
2009-08-23 17:01
Kaapstad - Suid-Afrika gaan vir die gouemedaljewenner Caster Semenya 'n heldeontvangs gee wanneer sy hierdie week vanuit Duitsland terugkeer.
Nkosazana Dlamini Zuma, minister van binnelandse sake, het Sondag oor die telefoon met die 800m-ster gesels.
Semenya se manlike gelaatstrekke het gelei tot 'n geslagstoets deur die internasionale atletiekbeheerliggaam (IAAF).
"Caster verdien ons land se ondersteuning teen die aanval wat op haar gevoer is," het Dlamini Zuma in 'n verklaring gesê.
"Vir ons is Caster doodeenvoudig die beste 800m vroue Wêreldkampioen en sy moet 'n heldeontvangs kry wanneer sy Dinsdag terugkeer," het die minister gesê.
Die debat oor die geslagstoetse het groot opspraak in Suid-Afrika verwek, met die regerende party en sy jeug- sowel as vrouevleuel wat die toetse as "rassisties en seksisties" bestempel.
Dlamini Zuma het gesê dat Caster die land trots gemaak het, ten spyte van die vraagstuk oor haar geslag.
"Alle Suid-Afrikaners, veral vroue, moet saamstaan oor Caster en die toetse deur die owerhede ten sterkste afkeur."
Julius Malema, leier van die ANC Jeuglia het gesê "die besluit om Semenya te toets is rassisties en seksisties."
- Sapa