Semenya: dis glo SA-rassiste se skuld
2009-08-21 14:08
Johannesburg – Leonard Chuene, die president van Atletiek Suid-Afrika (ASA), het Vrydag gesê dat rassistiese Suid-Afrikaners verantwoordelik is vir die bohaai aangaande Caster Semenya se geslag.
Semenya het verlede maand die wêreld verras toe sy die junior Afrika 800m titel in 1:65:72 sekondes gewen het.
Maar toe sy Berlyn aankom vir die atletiek Wêreldkampioenskappe het die internasionale atletiekbeheerliggaam (IAAF) gevra dat toetse gedoen moet word om haar geslag te bepaal.
Chuene het gesê dat ASA nooit ‘n rede gehad het om Semenya se geslag te betwyfel nie, ten spyte van haar gespierde lyf, gesigshare en diep stem.
Hy het gesê dat ASA nie vure sou kon doodslaan indien Semenya vroeër getoets was nie.
“Asa se verantwoordelikheid is om kinders op te lei en hulle na die kampioenskappe te neem,” het Chuene gesê.
“Wanneer ‘n kind gebore word neem die ouers nie die kind vir toetse om te bevestig of dit ‘n seun of ‘n meisie is nie. Hulle kyk net.”
“Die familie bring vir ons ‘n kind en as hulle sê dit is ‘n meisie, aanvaar ons dit.”
“Ons berei haar dan voor, soos ons gedoen het, en sy het goud gewen. So ons het ons werk gedoen. Sê julle vir my wat ons meer kon gedoen het..”
Chuene het rassistiese Suid-Afrikaners daarvan blameer dat hulle briewe vir die IAAF geskryf het.
Hy glo dit was die afsetpunt van die ondersoek oor haar geslag.
“Dit gaan oor rassisme,” het Chuene gesê.
“Hierdie bewerings kom van Suid-Afrikaners. Hoekom het hulle aan die IAAF geskryf?”
“Dit is dieselfde mense wat nie 2010 wil sien gebeur nie, dieselfde mense wat swart mense afbring en dieselfde mense wat weier om te glo dat Suid-Afrikaners dit tot op die wêreld podion kan maak,” het hy gesê.
Die toetsresultate sal eers oor vyf weke beskikbaar wees.
- Sapa