Seksskandaal ruk Paralimpiese Spele

2012-08-23 15:05

Ammam – Drie lede van Jordanië se span by die Paralimpiese Spele is uit die toernooi onttrek nadat hulle van seksuele aanranding by 'n oefenkamp in Noord-Ierland beskuldig is, het 'n beampte Donderdag gesê.

"Jordanië se Olimpiese komitee het besluit om die drie lede te onttrek. Hulle sal Donderdagmiddag in Ammam aankom," het 'n lid van die komitee op voorwaarde van anonimiteit gesê.

Die drie mans is Woensdag op borgtog vrygelaat, het die komiteelid bygevoeg.

Jordanië se besluit volg 'n dag nadat die land benadruk het dat "geen wangedrag geduld sal word nie" en dat dit volle vertroue in die Britse regstelsel het.

Twee gewigoptellers in rolstoele en hul afrigter het Woensdag op aanklagte van seksuele geweld en afloerdery in die hof verskyn.

Alhoewel 'n senior regeringsamptenaar berigte ontken het dat Jordanië se koning Abdullah II persoonlik probeer ingryp het, het hy gesê die koning is "bekommerd" oor die aantygings.

"As dit bewys word sal Jordanië, wat die hof ten volle ondersteun, die optrede veroordeel. Maar terselfdertyd ondersteun Jordanië sy burgers binne én buite die land," het die amptenaar Woensdag gesê.

Die mans is Maandag in die dorp Antrim, noordwes van Belfast, in hegtenis geneem nadat drie vroue klagtes aanhangig gemaak het.

Omar Sami Qaradhi (31) is uitgeken deur 'n 14-jarige meisie, wat beweer het dat sy langs hom gestaan het vir 'n foto toe hy haar tussen haar bene gegryp het.

Qaradhi word ook van afloerdery beskuldig nadat hy glo 'n vroue-kleedkamer binnegegaan het.

Op dieselfde dag het 'n 16-jarige meisie saam met 'n vriend langs 'n rivier naby die span se oefenkamp gewandel toe die drie verdagtes haar pad versper het.

Die polisie beweer een van die mans het haar na Omar gestamp wat sy arms om haar gesit en haar vasgehou het, maar dat sy toe weggehardloop het.

Die drie verdagtes se volgende hofverskyning is op 18 Oktober.

Volg Nuus24Sport op Twitter.