Schumacher: Alonso, Ferrari gaan wen
2010-02-27 16:22
Barcelona - Michael Schumacher glo sy voormalige aartsvyand Fernando Alonso en sy voormalige span Ferrari is die gunstelinge om hierdie jaar die Formule-1 seisoen te wen.
"Ek dink Felipe (Massa) en Fernando lyk tans soos die ouens om te klop," het Schumacher Staerdag gesê.
"Hulle het sover goed gevaar en dinge lyk goed. Ek ken die span en weet dus daar is redes om oor bly te wees. Ek is glad nie verras nie."
Alonso en Schumacher het mekaar behoorlik die stryd aangesê tydens die 2005 en 2006 seisoene om te kyk wie kraai koning van die renbaan.
Schumacher het daarna afgetree, na 11 seisoene by Ferrari.
Ten spyte van sy sewe wêreldkampioneskappe en rekorgetal 91 oorwinnings onder die belt, sê Schumacher hy sukkel nogal om die ander spanne uiteen te sit.
"Ek weet nog nie wie al hul kaarte gespeel het nie," het die 41-jarige renjaer by die Circuit de Catalunya, gesê. Die F1-spanne is hier besig om die finale voorbereidings vir die seisoen te doen.
Schumacher het 'n effense u-draai gemaak op sy kommentaar Vrydag, toe hy gesê het dit is onwaarskynlik dat sy Mercedes-span hierdie jaar gaan wen.
"Gister (Vrydag) het ek 'n bietjie pessimisties gevoel, maar ek was nie bewus van die data nie. Dit was 'n aanvanklike gevoel. Maar dit blyk ons gebruik meer petrol as die ander spanne, wat dalk verduidelik waarom ons tye op die baan dalk nie nie so goed was nie.
"As jy egter na die data kyk, lyk dinge nie te sleg nie - dit lyk skaflik," het hy gesê.
- Sapa-AP