Saskok sê ook Semenya mag nie
2010-01-15 16:42
Johannesburg – Caster Semenya mag nie aan enige wedlope deelneem totdat 'n finale besluit nie geneem is oor die uitslae van haar geslagstoetse nie, het die Suid-Afrikaanse Sportkonfederasie en Olimpiese Komitee (Saskok) Vrydag bekendgemaak.
"Kom ons wees duidelik oor een ding. Soos dinge nou lyk, word Caster nie toegelaat om in enige byeenkoms of wedloop deel te neem nie. Die kwessie van die uitslae van haar geslagstoetse sit nog steeds by die internasionale organisasie, die IAAF [Internasionale Vereniging van Atletiekfederasies]," het Saskok-president Gideon Sam in 'n verklaring gesê.
"Hulle is nog besig om hulle werk te doen en die proses duur voort," het Saskok gesê.
Die organisasie het gesê Semenya se afrigter, Michael Seme, het "onverantwoordelik en sonder die nodige gesag" opgetree toe hy gesê het sy sal in die Atletiek Suid-Afrika-seisoen wat kom teen vroue hardloop.
Seme het vroeër vandeesweek aangekondig dat Semenya vanjaar weer aan kompetisies sal deelneem, maar toe hy Vrydag vir meer inligting gevra is, het hy geweier om kommentaar te lewer.
Daar is onder andere beweer dat Semenya aan die Geelbladsye-reeks sal deelneem.
IAAF-woordvoerder Nick Davies het net gesê: "Die amptelike posisie van die IAAF is dat ons nie enige kommentaar lewe voor die saak nie opgelos is nie."
Davies het egter Woensdag in 'n e-pos aan Die Burger gesê die IAAF het geen probleem daarmee as Semenya aan die Geelbladsye-reeks deelneem nie. Hy het dit duidelik gestel sy is nie geskors nie en kan deelneem totdat die IAAF 'n finale besluit geneem het.
–Sapa