Sportbaas ‘sal self toilette skrop as dit moet’
2010-09-27 12:10
Johannesburg – Hy sal selfs die toilette skoonmaak om seker te maak sy land presteer op die Statebondspele wat oor sowat ’n week in Nieu-Delhi, Indië, begin, het Suid-Afrika se Olimpiese baas gesê.
Volgens Gideon Sam, president van die Suid-Afrikaanse Sportkonfederasie en Olimpiese Komitee (Saskok), is daar geen rede waarom Suid-Afrika moet onderpresteer nie en sal hy inspring om dit vir die atlete aangenamer te maak.
“Ons atlete het geen verskoning as hulle nie op die Spele presteer nie,” het Sam Saterdagaand op ’n afskeidgeselligheid in Boksburg gesê voordat die span Sondag na Indië vertrek het.
“As hulle ontevrede is omdat hul kamers nie skoon is nie, sal hulle hul baadjies moet uittrek en dit self moet skoonmaak.
“Ons sal nie kla nie. Suid-Afrikaners doen dit nie. En as ek Vrydag daar aankom en ’n toilet is nie skoon nie, sal ek dit self skoonmaak.”
’n Paar lande het hul spanne se vertrek na Delhi uitgestel, aangesien organiseerders nog opruimingswerk doen.
Sommige atlete het hulle selfs Sondag aan die Spele onttrek.
Terwyl Indië onder baie kritiek deurloop weens akkommodasie-, konstruksie- en sekerheidsprobleme het Sam ’n beroep op Suid-Afrikaners gedoen om positief te bly.
Hy het ook ’n hou na ontwikkelde lande gemik wat die Spele se organiseerders kritiseer.
Dit ondanks beeldmateriaal van die swak toestand van die dorpie waarin atlete moet bly, ’n brug wat naby die hoofbyeenkomsplek inmekaargesak het én ’n aanval op toeriste twee weke voor die Spele.
’n Slang is glo ook in ’n Suid-Afrikaanse deelnemer kamer in die atlete-dorp gevind.
“Ons moet as ontwikkelende lande saamstaan. Ons kan nie toelaat dat ontwikkelde lande altyd die laaste woord inkry nie,” het Sam gesê.
“Ons het soortgelyke probleme met dié lande voor die Wêreldbeker-sokkertoernooi gehad.”
Intussen moes organiseerders van die Spele skarrel om geriewe gereed te kry terwyl nasionale spanne reeds begin opdaag het.
Atlete is by die dorp waar hulle tuisgaan, begroet met grootskaalse opruiming wat die skoonmaak van toilette en die verwydering van bourommel ingesluit het.
Die Spele-federasie het ontken dat hy nagelaat het om sake in Delhi dop te hou.
Hy het die skuld op die Indiese regering gepak.
Verder het Maleisiese sportamptenare hul atlete teen knokkelkoors (dengue fever) tydens die Spele gewaarsku.
Tunku Imran Tuanku Ja’afar, president van Maleisië se Olimpiese Komitee, meen hulle moet op die uitkyk wees vir muskiete wat dié siekte versprei.
- SAPA