SA'ner slaan groot slag
2010-09-01 07:35
Johannesburg - Suid-Afrika se Kevin Anderson het Dinsdagoggend vroeg (SA tyd) die eerste keer in sy loopbaan tot die tweede ronde van ’n Grand Slam-tennistoernooi deurgedring toe hy Indië se Somdev Devvarman in die eerste ronde van die Amerikaanse Ope in skoon stelle verslaan het.
Die 24-jarige Johannesburger kon in ses vorige pogings nooit verby die eerste ronde van ’n Grand Slam-toernooi vorder nie, maar hy het dit in New York met die grootste gemak sewende maal skeepsreg gemaak deur Devvarman met 6-3, 6-4, 6-3 te klop.
Die wedstryd het net langer as twee uur geduur. In dié tyd het Anderson sy blitsige afslaan as ’n dodelike wapen ingespan en 12 kishoue afgeblits. Boonop het hy sy voormalige dubbelspelmaat laat sweet met ’n reeks akkurate voorarmhoue.
“My voorarmhoue is iets waaraan ek nogal baie saam met my afrigter gewerk het,” het hy volgens Virginia News gesê. “Ek weet reeds ek kan ’n paar maklike punte met my afslaan kry, en nou voel dit of ek nog ’n wapen in my arsenaal het.”
Anderson se volgende wedstryd is teen die 26ste gekeurde, Tomaz Bellucci van Brasilië.
Die vyfmalige kampioen, Roger Federer, het ’n waarskuwing aan die res van die aanspraakmakers gestuur toe hy Argentinië se Brian Dabul so gemaklik geklop het dat hy nog tyd gehad het om ’n skouspelagtige toertjie uit te voer.
Federer het die skare in die negende pot van die tweede stel na hul asem laat snak toe hy ’n wenhou tussen sy bene deur geslaan het. “Dis nie asof jy daardie houe kan oefen nie, of jy kry dit reg, of jy doen nie,” het hy volgens Sapa gesê.
Ander mans wat tot die tweede ronde deurgedring het, is Nikolay Davydenko (6de gekeur), Andy Roddick (9de) en Robin Soderling (5de).
In die vroue-afdeling het Venus Williams (3de) haar eersteronde-wedstryd in skoon stelle gewen. Jelena Jankovic (4de) is tot drie stelle gedwing om die Roemeen Simona Halep te klop.
Bly op hoogte van al die jongste sportnuus deur Nuus24Sport op Twitter te volg.
- Sport24