SASCOC skors ASA
2009-11-06 23:29
Johannesburg – ‘n Dag nadat die raad en talle werknemers van Atletiek Suid-Afrika (ASA), oor hulle hantering van die Caster Semenya-geslagstoets debakel geskors is, het die Suid-Afrikaanse Sportkonfederasie en Olimpiese Komitee (Sascoc) ASA se lidmaatskap geskors.
"Sascoc het ASA as ‘n lid van Sascoc geskors,” het Sascoc luidens ‘n verklaring gesê.
Die skorsing kom nadat Sascoc ‘n brief van ASA se prokureurs ontvang het waarin hulle beweer Sascoc het nie die reg gehad om die raad en sommige wernemers te skors nie.
Die Olimpiese komitee se besluit was glo "onredelik en onregverdig”.
Luidens ‘n verklaring van Sascoc se uitvoerende komitee, “wil hulle dit net duidelik maak dat die organisasie regsbevoegdheid in die Republiek en oor sy lede, amptenare en atlete het en dat ASA ‘n lid van Sascoc is.”
Die verklaring het bygevoeg dat “lede, (insluitend ASA) ondergeskik is en moet die grondwet van Sascoc en alle besluite wat deur hulle gemaak word, volg.”
"Verder het Sascoc, deur sy raad, die mag om alles na te sien, delegeer, beheer, administreer en indien nodig die aktiwiteite van sy lede bestuur.”
-Sport24