SA-vroue skok Spanje
2010-09-01 11:01
Rosario – Suid-Afrika se vrouehokkiespan het ‘n skok-oorwinning van 2-1 teen Spanje in die Wêreldbeker-toernooi Dinsdag in Argentinië behaal.
Die laaste keer wat die Proteas 'n oorwinning in 'n Wêreldbeker-toernooi kon behaal, was in 2002 in Perth teen die Oekraïne.
Pietie Coetzee het die eerste doel in Dinsdag se kragmeting teen Spanje aangeteken nadat ‘n strafhoek aan die Proteas toegeken is.
Spanje se Nuria Camon het die gelykmaker kort voor rustyd aangeteken.
Sulette Damons het die wedstryd vir Suid-Afrika met die Proteas se tweede doel beklink.
Spanje se afrigter, Pablo Usoz, het gesê die Suid-Afrikaners het die wedstryd baie beter beheer en ook beter gebruik gemaak van hul strafhoeke.
Die Proteas het hul eerste groepwedstryd Maandag teen die verdedigende kampioene Argentinië met 5-2 verloor.
Suid-Afrika, die wêreld se nr. 12-span, is die laagste gekeurde span in die toernooi en is in dieselfde groep as Argentinië (tweede in die wêreld), China (derde), Engeland (sesde), Spanje (agtste) en Korea (elfde).
Proteas se volgende wedstryde:
Donderdag, 2 September: SA teen China
Saterdag, 4 September: SA teen Engeland
Maandag, 6 September: SA teen Korea
Bly op hoogte van al die jongste sportnuus deur Nuus24Sport op Twitter te volg.
- Sport24