SA-vroue pak China
2010-09-02 11:06
Rosario, Argentinië - Suid-Arika se vrouehokkiespan sal op hul strydrosse én groentjies staatmaak wanneer hulle China Donderdagaand in die Wêreldbeker-wedstryd in Rosario aandurf.
Die kaptein van die Proteas, Marsha Marescia, sal in haar 203de internasionale wedstryd speel terwyl die doelevraat Pietie Coetzee al nader kruip aan haar 200ste doel in 200 toetswedstryde.
Die nuweling Sulette Damons sal na 'n skitterende vertoning teen Spanje, ook teen China wil beïndruk.
China se vrouehokkiespan is derde vir dié toernooi gekeur, maar het in hul vorige wedstryde teen die elfde gekeurde Korea asook teen Engeland, wat sesde gekeur is, vasgeval.
Suid-Afrika het in hul eerste groepwedstryd met 5-1 teen die verdedigende kampioen Argentinië verloor, voor hulle Dinsdag ‘n skok-oorwinning van 2-1 teen Spanje behaal het.
Die wedstryd tussen China en Suid-Afrika word vanaand om 19:30 regstreeks op SuperSport 5 uitgesaai.
Bly op hoogte van al die jongste sportnuus deur Nuus24Sport op Twitter te volg.
- Sport24