SA troef Singapoer in WB
2011-07-06 08:25
Johannesburg – Die verskil tussen die Proteas se beste beskikbare netbal-kombinasie en hul moontlike plaasvervangers is Dinsdag in hul oorwinning van 70-33 oor Singapoer beklemtoon.
Die Suid-Afrikaanse afrigtingspan het sy tweede Wêreldbeker-wedstryd hier met ’n paar tweedekeuse-spelers begin.
Hy is egter gedwing om die ou staatmakers op te stuur nadat die Proteas die eerste kwart met 13-15 verloor het.
Die doelskieter Claudia Basson (wat Tsakane Mbewe vervang het), die kaptein, Amanda Mynhardt (in die plek van Zukelwa Cwaba), en die onderkaptein, Zanele Mdodana (vir Thuli Qegu), het onmiddellik ’n verskil vir die Proteas gemaak.
Een van Basson se grootste bates is dat sy vir haar ruimte in die doelsirkel skep.
Dit het dit vir haar spanmaats veel makliker gemaak om haar met goeie aangeë te voer.
Terselfdertyd het haar doelmaat, Maryka Holtzhausen, met meer selfvertroue begin speel en haar langafstand-talente behoorlik laat tel.
Sake het ook beter verloop aan die ander kant van die baan, waar Mynhardt en haar mede-Pretorianer Leigh-Ann Zackey die doelskieters van die gasheerspan geen ruimte gegun het nie.
Singapoer het die druk gevoel en kon in die duur van die kwart net ses doele aanteken.
Met Basson en Holtzhausen wat tussen hulle 19 doele aangeteken het, was die rustyd-voorsprong ’n gerieflike 32-21.
Die Proteas het ná rustyd werklik voet op die versneller gesit, en daar was nie ’n enkele swak skakel nie.
Dié tydperk is gekenmerk met die spel wat die Suid-Afrikaanse afrigterspan Maandag (in die nederlaag) teen Jamaika wou gesien het: om die wedstrydplan perfek uit te voer – met spoed en akkuraatheid.
Hulle het die laaste twee kwarte met onderskeidelik 17-9 en 21-3 gewen.
Hoewel elke speler haar kant gebring het, verdien die aanvallende vleuel, Bongi Msomi, spesiale vermelding vir haar goeie spel.
Msomi is ’n voormalige o.21-kaptein.
Sy was teen Singapoer in net haar tweede internasionale wedstryd betrokke, maar is so vinnig soos blits en die tuisspan het dit onmoontlik gevind om haar in toom te hou.
- Intussen het die president van netbal se wêreldbeheerliggaam, Ifna, Dinsdag aan Reuters gesê sy sien ’n Olimpiese toekoms vir haar sport, maar hoop die Internasionale Olimpiese Komitee sal nie aandring op ’n manskompetisie ook nie.
“Ek dink nie mans-netbal is al op ’n vlak om iets soos ’n Wêreldtoernooi vir hulle te regverdig nie,” het Molly Rhone in Singapoer gesê.
Rhone het bygevoeg: “Ons is elke jaar in kontak met die IOK, ons is ’n erkende sport en ons probeer nou aan meer multisport-byeenkomste deelneem.”
Vir die jongste sport volg Nuus24Sport op Twitter.
– Sport24