SA se beste spiesgooiers pak mekaar
2011-02-17 10:02
Pretoria - Suid-Afrika se twee beste spiesgooiers, Robert Oosthuizen en Hardus Pienaar, sal Saterdagmiddag in Potchefstroom op die eerste atletiekbyeenkoms in die Geelbladsye-reeks die eerste keer ná 11 maande teen mekaar deelneem.
Die laaste keer dat hulle saam in aksie was, was in Maart verlede jaar in Durban op die Suid-Afrikaanse byeenkoms.
Hul tweestryd was toe kortstondig.
Oosthuizen het sy lies geskeur voordat hy klaar kon gooi. Hy kon die res van die jaar nie deelneem.
Pienaar het die SA titel verower. Daarna is sy seisoen ook deur meer pyn en frustrasie as spiesgooi-welslae gekenmerk. Dit was ’n geval van gooi en dan is hy weer beseer.
Maar toe dit regtig saak gemaak het, het Pienaar op die Wêreldbeker-byeenkoms in Split, Kroasië, met ’n grote vorendag gekom.
Sy afstand van 83.17 meter was goed genoeg vir die silwermedalje.
Pienaar en Oosthuizen is die enigste twee spiesgooiers wat sedert 2006 gereeld verder as 80 meter kon gooi. Oosthuizen se beste afstand is 86.80 in 2008, terwyl Pienaar sy beste afstand van 84.50 in 2003 behaal het.
Marius Corbett 88.75 (1998) en Tom Petranoff 87.26 (1992) is die enigste Suid-Afrikaners wat met beter afstande spog.
Bly op hoogte van al die jongste sportnuus deur Nuus24Sport op Twitter te volg.
- Sport24