SA se Anderson val vas teen Djokovic
2011-05-05 09:26
Kaapstad - Suid-Afrika se Kevin Anderson het moedig probeer, maar daar is steeds geen keer aan Novak Djokovic nie.
Dié Serwiër, wat met groot volwassenheid en baie selfvertroue speel, het Woensdag sy 28ste agtereenvolgende tennissege vanjaar behaal.
Anderson en Djokovic het die tweede keer vanjaar in ’n Meesterstoernooi kragte gemeet.
Woensdag was dit in die tweede ronde van die Madrid-toernooi en die naasbeste speler ter wêreld was met 6-3, 6-4 baas. Vroeër vanjaar het Djokovic in Miami met Anderson afgereken.
Anderson en Djokovic het 100 minute lank sake uitgespook en skouspelagtige tennis opgedis.
Dié twee het nie soseer op mekaar se foute geteer nie, maar eerder probeer om met wenners hul teenstander tot oorgawe te dwing.
Die telling is ietwat misleidend, want soos in Miami moes die Australiese Opekampioen uithaal.
Anderson het in die tweede pot van die tweede stel twee breekpunte gehad, maar kon nie dié kanse benut nie.
Anderson is een van die spelers wat vanjaar die meeste vordering in die internasionale arena getoon het.
Hy het die seisoen buite die top-50 begin en is tans 35ste nadat hy in Februarie sy eerste titel verower het.
Die koue werklikheid is dat die 24-jarige Anderson die wêreldranglys nóg sal moet klim, anders is kragmetings soos dié, met die beste spelers ter wêreld in die tweede ronde van toernooie, nog lank sy voorland.
Hy kan hom egter daaraan troos dat niemand nog vanjaar met Djokovic kon afreken nie.
Dié 23-jarige speler het in die proses vyf titels verower, waaronder die eerste Grand Slam-toernooi van die jaar, die Australiese Ope.
Nie eens die beste speler ter wêreld, Rafael Nadal van Spanje, kon Nole, soos die Serwiër bekend staan, stuit nie.
Nadal het Woensdag sy plek in die derde ronde bespreek toe hy Marcos Baghdatis met 6-1, 6-3 geklop het.
Die Spanjaard is die verdedigende kampioen in Madrid.
Nadal en Djokovic kan mekaar in die eindstryd ontmoet.
Dit was ook die geval in Miami en Indian Wells.
Djokovic benodig een sege om Ivan Lendl se rekord van 29 onoorwonne seges te ewenaar. Lendl het dit aan die begin van 1989 vermag.
Vir die jongste sportnuus volg Nuus24Sport op Twitter.
- Sport24