SA rol dubbele goud los
2010-10-11 10:07
Nieu-Delhi - Suid-Afrika se rolbal-spelers het Sondag hul staal gewys
toe hulle Statebond-goud opgeraap het in albei die
drietal-kompetisies.
Sowel die mans-drietal- as vroue-drietal-spanne het
goue medaljes gewen deur met Australiese teenstanders af te reken.
En albei moes eers deur die kookpot van ’n uitspeelstryd kom nadat hul wedstryde ná twee stelle gelykop was.
Die
vroue, Susanna Steyn, Tracy-Lee Botha en Susan Nel, het eerste goud
gewen en die uitdaging aan die mans – Johann du Plessis, Wayne Perry en
Gideon Vermeulen – gerig om ook so te maak. “Dis ’n wonderlike gevoel. Ek
is in die wolke,” het Nel, wat die wenpunt vir die vroue “ná ’n bietjie
geluk” aangeteken het, gesê. Du Plessis, Perry en Vermeulen se wedstryd
was ’n taai affêre.
Die Suid-Afrikaners het die eerste stel met
8-7 gewen en die tweede met 6-7 verloor, maar hulle het behoorlik
losgetrek in die uitspeelstel en ses punte teenoor nul aangeteken.
Benewens
die rolbalspanne se sukses het Suid-Afrika gister ook twee
silwermedaljes gewen. LJ van Zyl is sy Statebond-titel kwyt nadat hy
gister in die 400m-hekkies deur die Wallieser David Greene geklop is. Van
Zyl moes met silwer tevrede wees nadat hy effens gestruikel het net
voor die lyn.
Hy was vir die grootste deel van die wedloop voor,
maar die Wallieser het hom in die pylvak gevang en met ’n tyd van 48.52
sekondes gewen. Van Zyl was 11 honderdstes van ’n sekonde stadiger in
48.63.
Nog ’n Wallieser, Rhys Williams, die seun van die Britse
Leeus-vleuel JJ, was derde.
Die Pretoriase stoeier Heinrich Barnes het
silwer in die 66 kg-vrystylafdeling gewen nadat die Indiese
wêreldkampioen, Sushil Kumar, hom oorheers het in die stryd om die goue
medalje. Suid-Afrika was onsuksesvol in die padfietsry-renne vir mans en
vroue.
Carla Swart (agtste) en Cherise Taylor (10de) was die beste Suid-Afrikaners in die 112 km-ren vir vroue.
Net
twee Suid-Afrikaners, Johann Rabie (17de) en Jay Thomson (30ste) het in
die top-30 in die 168 km-ren vir mans geëindig. Robert Hunter was 40ste
en Daryl Impey 41ste.
Suid-Afrika beklee steeds die vyfde plek
op die medalje-tabel. Die land het nou ’n totaal van 31 medaljes gewen:
11 goud, 11 silwer en nege brons. Australië gee die pas aan met 61 goue
medaljes.
Bly op hoogte van al die jongste sportnuus deur Nuus24Sport op Twitter te volg.
- Sport24