SA kraai koning in moeilikste skof van fietstoer
2011-02-26 09:15
Stellenbosch - Die Suid-Afrikaanse padfietskampioen, die Kapenaar Darren Lill, is die eerste Suid-Afrikaner om ’n skof in die Toer van Suid-Afrika te wen.
Lill (DCM) was baas in gister se skof van Hermanus tot aan die bopunt van Ou Helshoogtepas oor 140km. In die heel moeilikste skof van die toer was die eerste vier jaers Suid-Afrikaners.
Lill is gevolg deur Johann Rabie (Bonitas), Jaco Venter (Willems Accent) en Daryl Impey (MTN-Qhubeka).
Nadat buitelanders die vorige vyf skofte van dié toer gewen het, was Lill oorstelp van vreugde én verligting om uiteindelik ’n skof vir sy land te wen.
“Ek moet eerlik wees en sê ek kan amper nie glo ons het nog nie ’n skof gewen nie, want ons jaers is goed. Of ek die Suid-Afrikaanse kampioen is of nie, ek is net bly ek kon dié skof wen,” het Lill gesê.
Max Cluer, lid van die organiseringskomitee, het gesê dit is baie gepas dat ’n Suid-Afrikaner die moeilikste skof van die toer gewen het. Die jaers moes oor Houwhoek-, Viljoenshoop-, Franschhoek- en Helshoogtepas gaan om by die eindpunt te kom. “Dit was ’n belangrike skof en die Suid-Afrikaanse ouens het mekaar lekker op Twitter aangevat oor die feit dat daar nog nie ’n Suid-Afrikaanse wenner was nie.
“Helshoogte het beslis die seuns van die manne geskei.”
Rabie, ’n boorling van Malmesbury, was ook ’n groot wenner op die dag. Hy het van die derde algehele plek na tweede opgeskuif, wat hom die voorste jaer van Afrika maak. Die Brit Kristian House is steeds die algehele voorloper.
Die laaste skof oor 100km begin om 12:00 in die Paarl en eindig omstreeks 14:00 weer daar.
- Sport24
Bly op hoogte van al die jongste sportnuus deur Nuus24Sport op Twitter te volg