SA hokkiespan, Indië deel louere
2010-03-09 10:00
Eunice Visagie
Kaapstad - So naby, maar tog so ver vir die Suid-Afrikaanse manshokkiespan in die Wêreldbeker-toernooi.
Suid-Afrika het gister in sy laaste groepwedstryd in Nieu-Delhi, Indië, gelykop (3-3) teen die gasheer gespeel.
Met dié uitslag eindig Suid-Afrika vyfde in sy groep en sal nou uitspeel vir die negende plek in die toernooi.
Dít nadat die Proteas so byna om ’n sewende plek uitgespeel het.
Suid-Afrika en Indië het albei 4 punte ná die vyf stryde, maar Suid-Afrika het ’n swakker doeleverskil ná die 12 doele wat hy teen Australië afgestaan het.
Die telling rustyd was 2-1 vir Indië.
Die Suid-Afrikaners sal in ’n mate teleurgesteld wees. Hulle het met 1-0 voorgeloop ná net 8 minute danksy ’n doel deur Lloyd Norris-Jones.
Indië se Sardar Singh het die telling 9 minute later gelykop gemaak en die tuisspan het kort voor rustyd die voortou geneem ná ’n doel van Diwakar.
’n Doel deur Justin Reid-Ross in die 39ste minuut het die telling weer gelykop gemaak.
Toe die speler van die wedstryd, Austin Smith, in die 47ste minuut ’n skitterende doel aangeteken het, was Suid-Afrika stert in die lug en stewig op pad na die gesogte top-8.
Indië het egter toe na ’n volgende rat oorgeskakel met die fanatiese ondersteuning van die skare. Vir die volgende 15 minute moes die Proteas bontstaan op die verdediging.
In die 66ste minuut van dié spannende stryd het Indië se Shivendra Singh die telling weer gelykop gemaak.
Indië het deurentyd die meeste besit en gebiedsvoordeel gehad, maar die Proteas het beslis kanse gehad om dié stryd te beklink en ’n allemintige vier plekke op die wêreldranglys te klim.
- Beeld