SA hekkies-breker hang spykerskoene op
2010-02-04 15:09
Wilhelm de Swardt
Pretoria - Die einde van ’n era in Suid-Afrikaanse atletiek het aangebreek met Ockert Cilliers se aankondiging dat hy as 400-hekkies-atleet uittree.
Cilliers se tyd van 48.02 sek. is die derde vinnigste ooit deur ’n plaaslike atleet.
Hy was deel van die groep atlete – Llewellyn Herbert (47.81), LJ van Zyl (47.94), Alwyn Myburgh (48.05) en Ter de Villiers (48.46) – wat van 2000 tot 2007 seker gemaak het dat die 400-hekkies een van die gewildste items in SA atletiek is.
Mense het kaartjies gekoop om dié “hekkie-brekers” in aksie te sien.
Herbert, Myburgh en De Villiers het reeds uitgetree. Dit beteken dat Van Zyl die enigste oorblywende lid van die vyftal is wat vanjaar steeds sal deelneem.
Cilliers beplan om vir oulaas eers sy Turkse atletiekklub in Turkye se nasionale liga te verteenwoordig.
“Die geld is net te goed om sommer net op te hou.”
Volgens die 28-jarige Cilliers is dit nie maklik om atletiek te los nie.
“Ek het nie ’n keuse nie. Ek het myself belowe dat ek nooit weer vir Suid-Afrika sal deelneem nie na dié wyse waarop die besluitnemers van Atletiek Suid-Afrika my weggelaat het uit die span wat aan die 2008 Olimpiese Spele in Beijing deelgeneem het.
“Daar is steeds ’n kans dat ek Nederland se atletiekspan kan verteenwoordig, maar dit kan nog ’n jaar of twee duur voordat ek my paspoort kry.
“Ek word nie jonger nie en ek moet een of ander tyd verantwoordelikheid begin aanvaar om die pot aan die kook te hou.
“Daarom het ek vanjaar begin om voltyds te werk. Ek oefen nog liggies saam met my vrou, Juannee, net om aan die gang te bly.”
Cilliers beskou 2004 as die “goue jaar” van sy atletiekloopbaan.
“Ek het daardie jaar amper elke keer wanneer ek deelgeneem het’n persoonlike beste tyd gehardloop.
“Ek het ook Suid-Afrika op die Olimpiese Spele in Athene verteenwoordig. Dit was ’n ongelooflike ervaring, al het ekself daar nie goed presteer nie. Ek het nie besef die Spele is so groot nie.”
Juannee, wat in 2008 Suid-Afrika se beste vroue-atleet in die 800 (2:03.38) was, gaan waarskynlik voortaan vir Nederland deelneem.
- Die Burger