SA-fietsjaers se bloedmonsters hertoets

2013-01-25 10:46

Johannesburg – Die bloedmonsters van meer as 50 Suid-Afrikaanse fietsryers wat verlede jaar geneem is, gaan weer vir die verbode middel EPO getoets word, het die Suid-Afrikaanse instituut vir dwelmvrye sport (SAIDS) Donderdag in 'n verklaring gesê.

Dit sluit fietsryers in wat aan alle groot pad- en bergfietswedrenne in die land deelgeneem het. 

SAIDS se aankondiging volg nadat Lance Armstrong erken het dat hy opkikkers tydens al sewe van sy Tour de France-oorwinnings gebruik het.

Die doel van die hertoetsing is om te bepaal of daar ‘n grootskaalse EPO-probleem in Suid-Afrika bestaan.

Verlede jaar is die Suid-Afrikaanse fietsrykampioen David George vir twee jaar geskors nadat hy positief vir EPO getoets het.

Wanneer EPO (eritropoïetien), wat ook natuurlik in die liggaam voorkom, misbruik word lei dit tot ’n hoë produksie van rooibloedselle.

Vir die jongste sportnuus volg Nuus24Sport op Twitter.

– Sport24