SA-bergfietsryer 2de beste in wêreld
2010-04-29 08:44
Wilhelm de Swardt
Pretoria – Burry Stander (Specialized/Mr Price) is volgens die Internasionale Fietsryvereniging (UCI) se jongste ranglys wat Dinsdag bekend gemaak is die wêreld se tweede beste bergfietsryer.
Dit is die beste posisie wat ’n Suid-Afrikaanse fietsryer tot nog toe op die UCI se padfiets- en bergfiets-ranglyste beklee het.
Frankryk se Olimpiese kampioen, Julien Absalon, is op die oomblik die wêreld se voorste bergfietsryer.
Stander het die afgelope naweek op die eerste Wêreldbeker-veldrenbyeenkoms in Dalby Forest in Engeland so byna vir Absalon en Nino Schurter, die huidige wêreldkampioen, weggejaag.
Met die aanbreek van die laaste drie rondtes het Stander voor gejaag, met Schurter en Absalon wat hard moes trap om by te hou.
Ongelukkig het Stander in die ren se sesde en laaste rondte, toe dit saak gemaak het, ’n klein foutjie begaan wat hom kosbare sekondes gekos het.
Schurter het die ren gewen, met Absalon tweede en Stander derde. Die tydsverskil tussen die eerste drie jaers was ’n skrale 14 sekondes.
Absalon het agterna in ’n onderhoud met cyclingnews.com erken dat Stander die sterkste jaer in die ren was en as hy (Stander) nie die fout begaan het nie hy waarskynlik sou gewen het.
Bly op hoogte van al die jongste sportnuus deur Nuus24Sport op Twitter te volg.
- Sport24