SA atletiek hou asem op oor verkiesing
2011-07-29 09:53
Pretoria – Mag wie ook al Saterdag as die nuwe voorsitter van Atletiek Suid-Afrika (ASA) verkies word werklik die belange van dié sportsoort eerste stel.
Dit is waarskynlik die wens van elke plaaslike atleet, afrigter en atletiekondersteuner ... en met goeie rede.
Sedert 2009 se Wêreldbyeenkoms in Berlyn, met die herrie wat rondom Caster Semenya se deelname ontstaan het, was Suid-Afrikaanse atletiek te veel kere om die verkeerde redes in die nuus.
Die wrede werklikheid is dat ASA op die rand van bankrotskap is en dat borge lugtig is om betrokke te raak. Dit is grootliks te danke aan Leonard Chuene, geskorste voorsitter, se spandabelrige bestuurstyl. Hy het skynbaar dié sportsoort in Suid-Afrika as sy koninkryk beskou.
Ernstige vrae moet ook oor ASA se ontwikkelingsbeleid die laaste paar jaar gevra word.
Die SA span wat oor vier weke in Daegu, Suid-Korea, aan die Wêreldbyeenkoms deelneem, is ’n bewys dat iets skort.
So kan Semenya en Stephen Mokoka sekerlik nie die enigste twee atlete in Pretoria wees wat werklik in middelafstand- en langafstandnommers uitblink nie. Nie dat dit in die ander stede veel beter gaan nie.
Dit is veral die stand van vroue-atletiek wat kommer wek. Hoe gebeur dit dat net drie vroue (Semenya, Sunette Viljoen en Justine Robbeson) die kwalifiserende A-vereiste vir die Wêreldbyeenkoms kon oortref?
Op die afgelope Wêreld-jeugbyeenkoms in Lille, Frankryk, het nie een meisiesatleet ’n medalje gewen nie. Waar is die volgende geslag belowende vroue-atlete?
Die 20-jarige Semenya is die enigste van haar era wat werklik bly presteer. Viljoen is 27 jaar oud en Robbeson 25.
Dit bewys dat geen van die talle belowende junior vroue-atlete in die afgelope sewe jaar ná skool aanhou presteer het nie.
’n Mens kan net hoop dat die besluitnemers mooi sal dink voordat hulle hul kruisies trek wanneer vir die nuwe ASA-voorsitter gestem word.
Dit is kommerwekkend dat daar nege benoemings vir die pos van voorsitter is.
Al afleiding wat gemaak kan word, is dat die eie ek steeds vir die besluitnemers belangriker is as die belange van atletiek.
SA atletiek het beslis nie nog ’n egosentriese leier nodig nie.
Wie ook al verkies word, moet homself afvra wat hy vir atletiek kan beteken en nie watter voordele sy betrokkenheid by atletiek vir hom mag inhou nie.
James Evans (WP), waarnemende ASA voorsitter, met ses benoemings, James Makoka (Noord-Gauteng), Hendrick Ramaala (Sentraal-Gauteng) en Harold Adams (Boland), al drie met drie benoemings, blyk die vroeë gunstelinge te wees.
Die ander benoemdes is Motlatsi Keikabile (Noordwes-Noord), James Moloi (Sentraal-Gauteng), Aleck Skhosana (KwaZulu-Natal), Tshifiwa Makhoshi (Limpopo) en William Mokatsanyane (SA Skole).
Vir die jongste sportnuus volg Nuus24Sport op Twitter.
– Sport24