SA atlete ewenaar 2003-prestasie
2011-09-05 09:33
Daegu, Suid-Korea –Caster Semenya se verowering van die silwermedalje in die 800m-eindronde (in 1:56.35 s) Sondag hier op die Wêreld-atletiekbyeenkoms, het een van Suid-Afrika se beste vertonings tot nog toe op die wêreldverhoog afgesluit.
Die Suid-Afrikaanse atlete het weliswaar geen goue medaljes gewen nie, maar dit is net die tweede keer dat Suid-Afrika vier medaljes op dié byeenkoms wen.
Die vorige keer was in 2003 in Parys.
LJ van Zyl (brons in die 400-hekkies), Sunette Viljoen (brons in die spiesgooi) en die SA 4x400-aflosspan, bestaande uit Oscar Pistorius, Shane Victor, Ofentse Mogawane, Willie de Beer en Van Zyl (silwer), is die ander helde.
Ruben Ramolefi (3000-hindernis), Viljoen (spiesgooi) en die 4x400-aflosspan het Suid-Afrikaanse rekords verbeter.
Pistorius, Paralimpiese kampioen wat tot die halfeindronde van die 400m deurgedring het, het die naasvinnigste tyd van sy loopbaan opgestel en die aflosspan gehelp om die nasionale rekord te verbeter.
Die 21-jarige Cornel Fredericks het vyfde in die eindronde van die 400-hekkies geëindig en die 20-jarige Luvo Manyonga was vyfde in die verspring-eindronde. Albei het die eerste keer aan ’n Wêreldbyeenkoms deelgeneem.
Suid-Afrika het die 17de beste van die 202 lande gevaar wat medaljes betref.
Die VSA was eerste met 25 medaljes, Rusland tweede met 19 en Kenia derde met 17.
Usain Bolt en sy Jamaika-spanmaats het Sondagaand die beste vir laaste gebêre toe hulle die wêreldrekord in die 4x100-aflos na 37.04 sekondes verbeter het.
Bolt-hulle het meer as 20 m voor die ander spanne geëindig. Dit was die enigste wêreldrekord wat op die byeenkoms opgestel is.
Bolt se spanmaats was Nesta Carter, Michael Frater en Yohan Blake (100-wêreldkampioen)
Frankryk was tweede in 38.20 en St. Kitts & Nevis derde in 38.49.
Die Suid-Afrikaanse 4x100-aflosspan (Hannes Dreyer, Ofentse Mogawane, Roscoe Engel en Thuso Mpuang) kon ondanks ’n moedige vertoning nie tot die eindronde deurdring nie.
Ná die tweede oorgee was Suid-Afrika in die tweede plek, maar ongelukkig het dinge effens met die derde oorgee gelol.
Dit het daartoe gelei dat die span sesde in sy uitdun in 38.72 geëindig het. Dit is die beste tyd die afgelope 10 jaar deur ’n Suid-Afrikaanse span.
Die vertoning van die Suid-Afrikaanse marathon-atlete hier, Coolboy Ngamole, Lucky Mohale en David Ngokane, was pateties.
Ngamole was 46ste in ’n tyd van 2:30:01 en Lucky Mohale 50ste in 2:38:22. David Ngakane het nie klaargemaak nie.
René Kalmer (2:38:16) het in die vroue-marathon ’n vinniger tyd as Mohale opgestel.
Abel Kirui van Kenia het in 2:07:38 gewen.
Vir die jongste sportnuus volg Nuus24Sport op Twitter.
– Sport24