SA atlete blom

2010-04-20 06:55

Wilhelm de Swardt

Pretoria - Suid-Afrika se atlete kan dalk in Oktober in Indië hul rekord van 11 medaljes op ’n Statebondspele verbeter.

Hul beste vertonings tot dusver was in 1998 in Maleisië (4 goud, 2 silwer en 5 brons) en in 2006 in Melbourne (5 goud, 4 silwer en 2 brons).

Dit is gevaarlik om suiwer volgens statistieke voorspellings te waag, maar ná die plaaslike atletiekseisoen wat Saterdag in Potchefstroom met die Suid-Afrikaanse Studentebyeenkoms tot ’n einde gekom het, lyk ­dinge belowend.

Die name van 17 atlete (14 mans en 3 vroue) verskyn op die Internasionale Vereniging van Atletiekfederasies (IAAF) se ranglyste van die 10 beste vertonings vanjaar.

Simon Magakwe is ná Saterdag se wentyd van 20.23 s die vinnigste atleet oor 200 m, terwyl Ruben Ramolefi met die vinnigste tyd (8:25.50) in die 3 000-hindernis spog.

Mbulaeni Mulaudzi, die wêreldkampioen in die 800 m, se 1:45.51 en Tumelo Thagane se 17.09m in die driesprong is albei die tweede beste.

Die 20-jarige Cornel Fredericks se 49.12 in die 400-hekkies word net deur twee atlete oortref, terwyl LJ van Zyl se 49.45 die vierde vinnigste is.

Die 18-jarige Luvo Manyonya, wat verras het deur op die SA Junior en Jeugbyeenkoms in Germiston die verspring met ’n sprong van 8.05 m te wen, beklee die vyfde plek.

Khotso Mokoena, ’n silwermedalje-wenner op die Olimpiese Spele en die Wêreldbyeenkoms, se beste sprong van 8.01 m besorg aan hom die sewende plek.

Windy Jonas (1:46.77 in die 800 m) en Tshamano Setone (13:25.51 in die 5 000 m) is ook in die sewende plek.

Elroy Gelant (13:25.88 in die 5 000 m) en Robert Oosthuizen (82.96m in die spiesgooi) is agtste, terwyl Cheyne Rahme die negende plek (5.50 m) in die paalspring beklee.

Ofentse Mogawane spog met die negende vinnigste tyd (45.51s) in die 400 m.

Oosthuizen sal waarskynlik weens sy liesbesering nie betyds herstel om aan die Statebondspele deel te neem nie.

Lehann Fourie, wat in die VSA studeer, is skitterend op dreef. Hy het die afgelope twee naweke 110-hekkieswedlope in die VSA gewen.

Sy wentyd die naweek in Kansas was 13.68s en die vorige naweek 13.67. Hy beklee die 16de plek.

Daarbenewens het Juan van Deventer en Johan Cronjé, Suid-Afrika se twee voorste atlete in die 1 500 m, nog nie regtig vanjaar begin deelneem nie.

Wat die vroue betref, is die twee Statebondspele-kampioene van 2006, Elizna Naudé (diskus) en Sunette Viljoen (spiesgooi), skitterend op dreef.

Albei beklee die vyfde plek. Naudé se beste afstand vanjaar is 64.49m en Viljoen s’n 63.45 m.

Justine Robbeson se 61.23 m op die Studentebyeenkoms is die 9de beste in internasionale spiesgooi vanjaar.