SA atleet soek Chuene-pos
2010-02-26 16:00
Johannesburg – Die voormalige wenner van die New York-marathon, Hendrick Ramaala, wil homself as president van Atletiek Suid-Arfrika (ASA) verkiesbaar stel wanneer ‘n nuwe ASA-raad oor ‘n paar maande verkies word.
Ramaala dien tans op die tussentydse raad wat verlede jaar in November verkies is nadat ASA se president, Leonard Chuene tesame met senior lede, geskors is.
Die 38-jarige atleet, wat vanjaar op 7 Maart aan die Lake Biwa-marathon in Japan gaan deelneem, glo hy het wat dit vereis om atletiek se strukture te herbou.
“Dit sal ‘n leuen wees om te sê ek stel nie belang in die pos nie,” het Ramaala Donderdag gesê.
Dié langafstand-atleet, wat die Suid-Afrikaanse rekordhouer in die 10 000 m en die half-marathon is, het gesê hy sal steeds as atleet kompeteer én genoeg tyd hê om ASA se administrasie te behartig.
“Daar was niemand op die vorige raad wat nie ander besigheidsbelange gehad het nie,” het Ramaala gesê.
“Atlete is meer as gereed om dié organisasie te bestuur. Jy het nie ‘n graad in politiek nodig nie jy het nodig om atletiek te verstaan," het hy bygevoeg.
ASA se tussentydse bestuur moet teen die einde van Mei vanjaar deur ‘n permanente raad vervang word.
- Sapa