Roger Federer skrik groot op Wimbledon
2010-06-22 08:27
Londen. – ’n Ongekeurde Colombiaan het Maandag amper vir die grootste opskudding ooit op Wimbledon gesorg toe hy die sesmalige kampioen, Roger Federer, so byna uitgeboender het in die eerste ronde.
Die eerste gekeurde Federer het vyf stelle en meer as drie uur nodig gehad om Alejandro Falla met 5-7, 4-6, 6-4, 7-6, 6-0 in die eerste ronde van dié tennistoernooi te klop.
Federer was glad nie op peil nie en hy het so byna sy rakette vir die eerste keer sedert 2002 voor die eindstryd gepak.
Die 28-jarige Switser se landgenote het hom ook nie juis veel vreugde verskaf nie toe hulle met 0-1 teen Chili in die Wêreldbeker-sokkertoernooi verloor het.
Federer moes uithaal en wys om te verhoed dat hy net die derde Wimbledon-kampioen word wat in die eerste ronde verloor. Falla is 60ste op die wêreldranglys.
Federer mik na ’n sewende Wimbledon-titel om Pete Sampras se rekord te ewenaar.
“Ek was beslis gelukkig vandag,” het Federer gesê.
“Ek het vanjaar al baie wedstryde verloor wat ek eintlik moes gewen het en dié een moes ek seker verloor het, maar ek het deurgeskraap.
“Dit is egter hoe grasbaan-tennis werk.”
Dit het Kim Clijisters ’n paar minute geneem om weer haar weg na die bane van die All Engeland Club te vind, maar sy het nie ’n sekonde verspeel om haar voete óp die baan te vind nie.
Dié Belg het in 2006 laas hier gespeel, maar sy het steeds daarin geslaag om Maria Elena Camerin van Italië met 6-0, 6-3 af te ransel.
“Ek was nogal op my senuwees én opgewonde. “Ek het so ’n bietjie gesukkel om Baan Twee te kry; gelukkig was daar ’n sekerheidswag wat geweet het waarheen ek moes gaan, want ek het geen idee gehad nie!” het die 27-jarige speler gesê.
Suid-Afrika se Kevin Anderson het gesorg vir ’n taai stryd deur die sewende gekeurde Nikolay Davydenko tot vyf stelle te dwing. Die Rus het met 3-6, 6-7, 7-6, 7-5, 9-7 gewen. Die Franse Ope-vrouekampioen, Francesca Schiavone, is uitgeskakel deur Rusland se Vera Dushevina.
Dié ongekeurde speler het met 6-7, 7-5, 6-1 geseëvier.
Bly op hoogte van al die jongste sportnuus deur Nuus24Sport op Twitter te volg.
- Reuters