Roddick én Rafa sien rooi
2011-09-09 09:05
New York. – Die Amerikaanse tennisspeler Andy Roddick het Donderdag van die baan af gestorm in sy kragmeting met David Ferrer nadat spel ná twee dae se deurdringende reën in die Amerikaanse Ope oplaas hervat is.
Dit het gevolg nadat dié wedstryd in die vierde ronde van die mansenkelspel na baan 13 geskuif is, omdat die ander bane te nat wees.
Hoewel die son geskyn het, is die wedstryd weer onderbreek om die water wat deur krake op die baan deurgesyfer het, op te droog. Nadat die spelers teruggekeer het, het Roddick gekla dat die baan steeds te nat was om voort te gaan.
“Hoekom is ons hier as daar water op die baan is? Dit maak my dood ... ek is verbysterd,” het Roddick briesend aan die toernooiskeidsregter, Brian Earley, gesê. Hy het sy sak opgetel en van die baan af gestorm.
Hy het later teruggekeer en die eerste twee stelle teen Ferrer, wat vyfde gekeur is, gewen. Die wedstryd was met druktyd nog aan die gang.
Rafael Nadal van Spanje, tweede gekeur, het sy kragmeting met Gilles Muller van Luxemburg met 7-6 (7/1), 6-1, 6-2 gewen. Nadal se eerste afslane was 73% in die kol, hy het 5 kishoue geslaan en net 11 ongedwonge foute begaan.
Andy Murray van Skotland (vierde gekeur) het die Amerikaner Donald Young met 6-2, 6-3, 6-3 van die baan af gevee.
In die kwarteindronde vir vroue het Samantha Stosur van Australië (negende gekeur) verras toe sy die tweede gekeurde Vera Zvonareva van Rusland met 6-3, 6-3 uitgeskakel het.
– Vroeër het Nadal en Roddick gesê die spelers se veiligheid word deur geldgierige beamptes op die spel geplaas nadat bitter min spel moontlik was.
Nadal was woedend nadat sy wedstryd teen Muller Dinsdag in ’n nat Arthur Ashe-stadion moes begin. Hy het saam met Roddick en Murray by Earley gekla.
“Ons wil nie op die baan gaan as dit reën nie. Ek dink nie dit is regverdig nie,” het Nadal gesê.
“Dit is dieselfde ou storie. Al waaroor julle bekommerd is, is die geld.”
Nadal het in ’n onderhoud met ESPN gesê: “Ons word nie beskerm nie. Daar is baie geld by die Grand Slams betrokke en ons is deel van die vermaak.
“Ek weet die toeskouers wil spel sien, maar die veiligheid van die spelers moet ook aandag kry,” het Nadal gesê.
Vir die jongste sportnuus volg Nuus24Sport op Twitter.
– Sport24