René mik na Olimpiese marathon
2011-05-04 09:12
Pretoria - ’n Nuwe hoofstuk in René Kalmer se atletiekloopbaan begin Sondag wanneer sy aan Praag se marathon deelneem.
Dit is die eerste keer dat Kalmer oor 42 km in ’n internasionale wedloop in aksie sal wees.
Sy wil Suid-Afrika aanstaande jaar in Londen op die Olimpiese Spele in die marathon verteenwoordig.
Baie kenners meen Kalmer kan die tweede Suid-Afrikaanse vrou in byna 10 jaar word wat die marathon vinniger as 2 uur en 35 minute voltooi.
Tanith Maxwell het verlede jaar die Berlynse marathon in 2:32:33 kafgedraf.
Elana Meyer (9 keer), Colleen de Reuck (9 keer) en Frith van der Merwe (2 keer) is die enigste ander plaaslike atlete wat al vinniger as 2:33 gehardloop het.
Kalmer het in 2009 die Soweto-marathon in 2:43:54 gewen. Dit was die eerste keer dat sy só ver gehardloop het.
Volgens die Suid-Afrikaanse kampioen in die 5 000 m het sy nie regtig ’n idee wat om te verwag nie. “Ek is opgewonde én senuweeagtig. Die marathon is anders. As jy dit nie respekteer nie, gaan jy gou nederig raak.”
Ná die Twee Oseane-halfmarathon was daar kommer of Kalmer wel in Praag sou deelneem, want sy het ná die wedloop van ’n pyn in haar knie gekla.
“Dit was net ’n senuwee wat in my heup vasgeknyp was. Ek is weer piekfyn. In die naweek in Richardsbaai het ek sonder moeite ’n halfmarathon gewen,” sê sy.
Volgens Kalmer gaan die kwik Sondag net tot 15 grade Celsius styg. Dit pla haar nie. “Die laaste paar weke se koue toestande in Johannesburg het my eintlik gehelp. Ek het die meeste van my lang oefensessies soggens gedoen. Ek is dus gewoond daaraan om in koue te hardloop.”
Kalmer hoop sy kan vinniger as 2:35 hardloop. “Dis my doelwit, maar ek wil nie onnodige druk op my plaas deur ’n sekere tyd te voorspel nie.
“Ek het uitgewerk teen watter pas ek wil hardloop. As ek ná die eerste 32 km nog goed voel, sal ek waarskynlik ’n goeie tyd jaag.”
Vir die jongste sportnuus volg Nuus24Sport op Twitter.
- Sport24