René maak marathon-debuut
2009-10-30 12:03
Pretoria - René Kalmer se voorbereiding vir die 2012-Olimpiese Spele in Londen begin Sondag amptelik, wanneer sy aan die Soweto-marathon deelneem.
Dit sal die eerste keer wees dat Kalmer – wat Suid-Afrika op verlede jaar se Spele in Beijing in die 1 500 verteenwoordig het – só ver hardloop.
Baie atletiekkenners meen sy kan een van Suid-Afrika se beste vroue-marathon-atlete word. Maar dit gaan nie al Sondag gebeur nie.
Kalmer maak dit duidelik dat sy geen groot planne vir die Soweto-marathon het nie.
“Vir my is dit net ’n begin. Dit is vir my belangrik om uit te vind waaroor die marathon nou eintlik gaan. Die verste wat ek nog gedurende ’n oefensessie gehardloop het, is 36 km. Ek het toe goed gevoel.”
Kalmer het al die Tough One-wedloop oor 32 km gewen.
Volgens Kalmer dink sy baie ernstig daaraan om vir die 2012-Spele in Londen in die marathon te probeer kwalifiseer, maar dit beteken nie dat sy nie meer aan baan-atletiek gaan deelneem nie.
“Die plan is dat ek steeds om in baanatletiek aan die 1 500 en die 5 000 deelneem. Een van my hoofdoelwitte vir aanstaande jaar is om my tyd in die 5?000 na goed onder 15 minute te verbeter.
“Ek sal ook graag aan die 10 000 op die baan wil deelneem, maar nie in Suid-Afrika nie. Ek dink dit moet sieldodend wees om op jou eie vir 25 rondtes om ’n baan te hardloop. Ek sal liewer in Europa aan die 10 000 deelneem waar die mededinging strawwer is en die ander atlete my kan help om my tyd te verbeter.”
Kalmer is die afgelope paar weke skitterend op dreef.
Die afgelope Sondag in Portsmouth, Engeland was sy vierde in ’n 16 km-wedloop.
Sy het haar persoonlike beste tyd na 55 minute en 5 sekondes verbeter. Kalmer was ook 15de op die Wêreld-halfmarathonbyeenkoms in Engeland, waar sy haar persoonlike beste tyd na 70:37 verbeter het.
Gerrie Coetzee, afrigter, meen Kalmer sal eers ná aanstaande jaar se baan-atletiekseisoen weer aan ’n marathon deelneem. Dan sal sy hardloop om ’n goeie tyd op te stel.
Kalmer is nog nie seker of sy al op aanstaande jaar se Statebondspele in Indië aan die marathon wil deelneem nie. Die humiditeit daar bekommer haar.
- Beeld