René draf magiese kerf kaf in Japan
2011-11-21 09:01
PRETORIA. – René Kalmer (Nedbank) het Sondag in Yokohama slegs die vierde Suid-Afrikaanse vroue-atleet geword wat ’n marathon in minder as 2 uur en 30 minute kon afdraf.
Ryoko Kizaki van Japan se wentyd was 2:26:32.
Kalmer was vyfde met haar uitstekende tyd van 2:29:59.
Dit is die eerste keer in 12 jaar dat ’n Suid-Afrikaanse atleet só ’n vinnige tyd hardloop.
“Ek is in die wolke,” het ’n verheugde Kalmer van haar in ’n e-pos laat hoor.
Sy het voorts geskryf: “Ek veronderstel noudat ek in die naweek die 42 km in minder as 2:30 afgedraf het, kan ek daarop aanspraak maak dat ek ’n ware marathon-atleet is.
“Uit die staanspoor het ek goed gevoel,”het sy bygevoeg.
“Ek moes my natuurlik voortdurend dwing om geduldig te wees en teen die pas te hardloop wat ek vooraf uitgewerk het. Die plan was om elke kilometer in sowat 3 minute en 33 sekondes af te lê.
“Dié plan het gewerk, want ek het van die 20ste tot die vyfde plek opgeskuif.”
Volgens Kalmer was toestande nie gunstig nie. “Die humiditeit was hoog. Wat veral gepla het, is die feit dat ons eers ná 12 uur in die middag weggespring het sodat sodat die wedloop regstreeks uitgesaai kon word.
“My deelname vroeër vanjaar in Suid-Korea op die Wêreld-atletiekbyeenkoms het beslis gehelp. Ek het daar geleer om my by moeilike omstandighede aan te pas.”
Kalmer hoop dat sy met dié vertoning haar plek in die Suid-Afrikaanse span, wat aanstaande jaar in Londen aan die Olimpiese Spele gaan deelneem, finaal bespreek het.
Elana Meyer 2:25:15, Colleen de Reuck 2:26:35 en Frith van der Merwe 2:27:36 is die enigste ander SA vroue wat ’n marathon al in ’n vinniger tyd as 2:30:00 afgedraf het.
Ryan Sandes het Sondag die eerste skof van die sesdaagse Planet Nepal-wedloop maklik gewen. Hy het dié skof oor 40 km in 10:08:14 afgelê.
Vir die jongste sportnuus volg Nuus24Sport op Twitter.
– Sport24